अहिल्यानगर येथे राज्यस्तरीय पुरस्कार सोहळा; विविध क्षेत्रांतील मान्यवरांचा गौरव
हिमायतनगर, उत्कर्ष मादसवार| तालुक्यात सामाजिक, आरोग्य, कृषी, समाजसेवा व उद्योजकता अशा विविध क्षेत्रांत उल्लेखनीय कार्य करणाऱ्या मान्यवरांचा अहिल्यानगर येथे आयोजित राज्यस्तरीय पुरस्कार सोहळ्यात गौरव करण्यात आला. यावेळी कुणबी मराठा महासंघाचे हिमायतनगर तालुकाध्यक्ष नारायणराव माने यांना त्यांच्या सामाजिक कार्याची दखल घेत ‘राज्यस्तरीय समाज भूषण पुरस्कार’ प्रदान करून गौरविण्यात आले.
समाजातील विविध घटकांच्या प्रश्नांसाठी सातत्याने कार्यरत राहणे, सामाजिक उपक्रमांमध्ये सहभाग तसेच समाज संघटनाच्या माध्यमातून केलेल्या कार्याची दखल घेत नारायण माने यांना हा पुरस्कार देण्यात आला. याच सोहळ्यात हिमायतनगर तालुक्यातील विविध क्षेत्रांत कार्यरत मान्यवरांचाही गौरव करण्यात आला.
आरोग्य क्षेत्रातील योगदानाबद्दल डॉ. विकास वानखेडे, कृषी क्षेत्रातील कार्याबद्दल निलेश वानखेडे व कृषी सहाय्यक नंदनवार, समाजसेवा पुरस्काराने मारोतराव पवार (पळसपुरकर), उद्योजक म्हणून अनिल गायकवाड (पळसपुरकर) यांच्यासह डॉ. मनोज राऊत व सुरेश पळशीकर यांचा पुरस्कार देऊन सन्मान करण्यात आला.
या पुरस्कार सोहळ्यास लोकपरिवर्तनचे संपादक डॉ. आबासाहेब शिरसाट, उपसंपादक पोपटराव सोनवणे, कार्यकारी संपादक डॉ. भारत भालेराव, प्रा. अशोक सूर्यवंशी, वृत्तसंपादक डॉ. मुकुंद निघोजकर यांच्यासह मान्यवरांची प्रमुख उपस्थिती होती.
राज्यस्तरीय ‘समाज भूषण’ पुरस्कार मिळाल्याबद्दल नारायणराव माने यांचे समाजबांधव, मित्रपरिवार व विविध क्षेत्रातील मान्यवरांकडून अभिनंदन करण्यात येत आहे.