‘सकारात्मक जीवन यात्रा’ आणि ‘राम का भव्य और अलौकिक स्वरूप’चे प्रकाशन; प्राचार्यांसह प्राध्यापक वृंदाकडून सत्कार
हिमायतनगर| हिमायतनगर येथील हुतात्मा जयवंतराव पाटील महाविद्यालयाच्या हिंदी विभागप्रमुख डॉ. शेख शेहनाज अहमद यांच्या साहित्यिक कार्याची दखल घेत त्यांच्या दोन नव्या पुस्तकांचे नुकतेच प्रकाशन झाले. ‘सकारात्मक जीवन यात्रा’ आणि प्रभू श्रीरामांच्या जीवन व आदर्शांवर आधारित ‘राम का भव्य और अलौकिक स्वरूप’ या दोन पुस्तकांच्या प्रकाशनामुळे महाविद्यालयाच्या शैक्षणिक व साहित्यिक क्षेत्रात आनंदाचे वातावरण निर्माण झाले आहे.
या दोन पुस्तकांच्या प्रकाशनासह डॉ. शेख शेहनाज अहमद यांच्या नावावर आतापर्यंत एकूण १२ पुस्तके प्रकाशित झाली आहेत. त्यांच्या या उल्लेखनीय साहित्यिक योगदानाबद्दल महाविद्यालयाच्या वतीने त्यांचा विशेष सत्कार करून पुढील साहित्यिक वाटचालीस शुभेच्छा देण्यात आल्या.
‘सकारात्मक जीवन यात्रा’ या पुस्तकातून मानवी जीवनाकडे सकारात्मक दृष्टिकोनातून पाहण्याचा संदेश देण्याचा प्रयत्न करण्यात आला आहे. तर ‘राम का भव्य और अलौकिक स्वरूप’ या पुस्तकातून प्रभू श्रीरामांचे जीवन, आदर्श व मूल्यांचा वेध घेण्यात आला आहे. त्यामुळे ही दोन्ही पुस्तके वाचकांसाठी प्रेरणादायी व मार्गदर्शक ठरतील, असा विश्वास यावेळी व्यक्त करण्यात आला.
डॉ. शेख शेहनाज अहमद यांनी आपल्या लेखणीतून सातत्याने दर्जेदार साहित्याची निर्मिती केली असून, त्यांच्या साहित्यिक योगदानामुळे महाविद्यालयाच्या नावलौकिकात भर पडली आहे. १२ पुस्तकांचा साहित्यिक टप्पा गाठणे ही महाविद्यालयासाठी अभिमानाची बाब असल्याचे यावेळी उपस्थितांनी नमूद केले.
महाविद्यालयाच्या प्राचार्या डॉ. उज्वला सदावर्ते यांच्या मार्गदर्शनाखाली आयोजित सत्कारप्रसंगी स्टाफ सेक्रेटरी प्रा. गुंडाळे यांच्यासह महाविद्यालयातील प्राध्यापक व शिक्षकेतर कर्मचारी मोठ्या संख्येने उपस्थित होते. प्रा. गुंडाळे यांनी डॉ. शेख शेहनाज अहमद यांच्या साहित्यिक प्रवासाचे आणि शैक्षणिक योगदानाचे कौतुक करून पुढील वाटचालीस शुभेच्छा दिल्या. डॉ. शेख शेहनाज अहमद यांच्या या साहित्यिक यशाबद्दल महाविद्यालयीन स्तरासह विविध क्षेत्रांतून त्यांच्यावर अभिनंदनाचा वर्षाव होत आहे.