खड्डे बुजविण्याऐवजी मुरुम-गिट्टीचा थर; पावसात रस्ता पुन्हा चिखलमय होण्याची शक्यता — कामाच्या गुणवत्तेवर ग्रामस्थांचा सवाल

देगलूर, गंगाधर मठवाले| शहापूर ते सुडगी फाटा या मार्गाची अवस्था दिवसेंदिवस बिकट होत असताना रस्ता दुरुस्तीच्या नावाखाली सुरू असलेल्या कामावरून ग्रामस्थांमध्ये तीव्र नाराजी व्यक्त होत आहे. खड्ड्यांमध्ये डांबर व गिट्टी टाकून रोलरच्या साहाय्याने दबाई करण्याऐवजी चक्क मुरुम व गिट्टी पसरवून रस्ता दुरुस्ती केली जात असल्याचा आरोप ग्रामस्थांनी केला आहे. त्यामुळे शासनाचा पैसा खर्च होऊनही रस्त्याचा प्रश्न कायम राहणार का, असा संतप्त सवाल नागरिक उपस्थित करीत आहेत.

शहापूर ते सुडगी फाटा मार्गावर जागोजागी मोठमोठे खड्डे पडल्याने रस्त्याची अक्षरशः चाळण झाली आहे. वाहनचालकांना खड्डे चुकवत प्रवास करावा लागत असून दुचाकीस्वार आणि एसटी बससह इतर वाहनधारकांना मोठी कसरत करावी लागत आहे. या पार्श्वभूमीवर रस्त्याच्या दुरुस्तीचे काम हाती घेण्यात आले; मात्र प्रत्यक्षात होत असलेल्या कामाच्या पद्धतीमुळे ग्रामस्थांच्या संतापात भर पडली आहे.

डांबराऐवजी मुरुम; पावसात पुन्हा चिखलाचा सामना? सध्या पावसाळ्याचे दिवस सुरू असताना रस्त्यावर मुरुमाचा थर टाकण्यात आल्याने पाऊस पडल्यानंतर हा मुरुम चिखलात रूपांतरित होण्याची शक्यता आहे. परिणामी वाहनांची ये-जा आणखी धोकादायक होण्याची भीती नागरिकांनी व्यक्त केली आहे. “रस्त्यावरील खड्डे कायमस्वरूपी बुजविण्यासाठी डांबर व गिट्टीचा वापर करून योग्य पद्धतीने दबाई करणे अपेक्षित असताना मुरुम टाकून केवळ थातूरमातूर डागडुजी का केली जात आहे?” असा सवाल ग्रामस्थांनी उपस्थित केला आहे.

आधीचे रस्तेही खड्ड्यात; पुन्हा त्याच पद्धतीची कामे? शहापूर परिसरातील यापूर्वी करण्यात आलेल्या काही रस्त्यांच्या कामांच्या गुणवत्तेवरही ग्रामस्थांनी प्रश्नचिन्ह उपस्थित केले आहे. संबंधित रस्त्यांवर काही कालावधीतच दोन ते तीन फुटांपर्यंतचे खड्डे पडल्याचा दावा नागरिकांनी केला आहे. त्यामुळे नवीन दुरुस्तीचे कामही दर्जाहीन ठरल्यास शासनाच्या निधीचा उपयोग नेमका कशासाठी, असा प्रश्न उपस्थित होत आहे.

रस्त्यांची दुरवस्था झाल्याने काही मार्गांवर महामंडळाच्या बससेवेवरही परिणाम होत असल्याचे ग्रामस्थांचे म्हणणे आहे. सार्वजनिक वाहतुकीसाठी महत्त्वाच्या असलेल्या रस्त्यांची अशी अवस्था राहणार असेल तर ग्रामीण भागातील नागरिकांनी प्रवास कसा करायचा, असा सवालही केला जात आहे.

तक्रारी करूनही कारवाई नाही? रस्त्यांच्या निकृष्ट कामांबाबत बांधकाम विभागाकडे यापूर्वी तक्रारी करण्यात आल्याचे ग्रामस्थ सांगतात. मात्र संबंधित ठेकेदारांवर ठोस कारवाई होत नसल्याने नागरिकांमध्ये नाराजी आहे.

बांधकाम विभाग आणि संबंधित ठेकेदार यांच्यात नेमके काय सुरू आहे? कामाच्या गुणवत्तेची प्रत्यक्ष पाहणी कोण करणार? मोजमाप पुस्तिका आणि बिलाची तपासणी कोणत्या निकषांवर होणार? या प्रश्नांची उत्तरे सार्वजनिक करण्याची मागणी ग्रामस्थांनी केली आहे.

काही ग्रामस्थांकडून विभागीय पातळीवर आर्थिक संगनमताच्या चर्चाही केल्या जात आहेत; मात्र या आरोपांची स्वतंत्र अधिकृत पुष्टी झालेली नाही. त्यामुळे वरिष्ठ अधिकाऱ्यांनी प्रत्यक्ष पाहणी करून वस्तुस्थिती स्पष्ट करावी, अशी मागणी होत आहे.

‘कोणाच्या मर्जीचा ठेकेदार?’ चर्चेला उधाण – दरम्यान, या कामामागे राजकीय वरदहस्त असल्याची चर्चाही परिसरात सुरू आहे. खासदार अजित गोपछडे किंवा आमदार जितेश अंतापूरकर यांच्या जवळच्या व्यक्तीला अथवा मर्जीतील ठेकेदाराला हे काम मिळाले असल्याची चर्चा ग्रामस्थांमध्ये आहे. मात्र याबाबत कोणतीही अधिकृत पुष्टी झालेली नाही. राजकीय संबंध कोणाचेही असोत, शासनाचा पैसा जनतेच्या रस्त्यासाठी खर्च होत असेल तर काम दर्जेदार असणे हीच अपेक्षा आहे, अशी भूमिका ग्रामस्थांनी व्यक्त केली आहे.

वरिष्ठ अधिकाऱ्यांनी ‘स्पॉट पंचनामा’ करावा – शहापूर-सुडगी फाटा रस्त्याच्या दुरुस्तीच्या कामाची तातडीने वरिष्ठ अधिकाऱ्यांकडून प्रत्यक्ष पाहणी, तांत्रिक तपासणी व गुणवत्ता चाचणी करण्यात यावी. मंजूर अंदाजपत्रकानुसार काम होत आहे का, वापरलेले साहित्य निर्धारित दर्जाचे आहे का, मुरुम टाकण्यास परवानगी आहे का आणि संबंधित कामाचे मोजमाप कसे करण्यात येत आहे, याची चौकशी करावी, अशी मागणी ग्रामस्थांनी केली आहे.

रस्ते दुरुस्तीच्या नावाखाली खड्ड्यांवर मुरुम टाकून शासनाचा निधी खर्च करण्याचा प्रकार असेल, तर तो थांबवून संबंधितांवर जबाबदारी निश्चित करावी. अन्यथा ‘रस्ता दुरुस्ती’च्या नावाखाली पुन्हा काही महिन्यांत त्याच रस्त्यावर खड्डे आणि नागरिकांच्या नशिबी पुन्हा त्रास, अशी परिस्थिती निर्माण होण्याची भीती ग्रामस्थांनी व्यक्त केली आहे.