नांदेड, प्रतिनिधी | महाराष्ट्र राज्यातील एकल महिलांचे सर्वेक्षण व नोंदणी करण्याचा निर्णय महायुती सरकारने घेतला असून, त्याची नांदेड महानगरपालिकेत प्रभावी अंमलबजावणी करण्याची मागणी भाजपा प्रदेश कार्यकारिणी सदस्य गजानन जोशी यांनी केली आहे.
नगर परिषद संचालनालयामार्फत राज्यातील सर्व नगर परिषद, नगर पंचायत तसेच महानगरपालिकांना एकल महिलांचे सर्वेक्षण व नोंदणी करण्याबाबत सूचनापत्राद्वारे निर्देश देण्यात आले आहेत. या उपक्रमांतर्गत प्रत्यक्ष घरोघरी जाऊन एकल महिलांची माहिती संकलित करून त्यांची नोंदणी करण्यासाठी संबंधित स्थानिक स्वराज्य संस्थांनी कर्मचारी पथक गठीत करावे, असेही सूचनापत्रात नमूद करण्यात आले आहे.
या पार्श्वभूमीवर नांदेड महानगरपालिकेच्या महिला व बालकल्याण सभापती सौ. सदिच्छा सोनी यांना निवेदन देऊन प्रभागनिहाय एकल महिला सर्वेक्षण व नोंदणी करण्यासाठी स्वतंत्र कर्मचारी पथके गठीत करण्याची मागणी गजानन जोशी यांनी केली.
नांदेड महानगरपालिकेने प्रभागनिहाय कर्मचारी पथके तयार करून घरोघरी सर्वेक्षण सुरू केल्यास एकल महिलांची अधिक अचूक माहिती उपलब्ध होईल. तसेच शासनाच्या विविध कल्याणकारी योजना व सुविधांचा लाभ पात्र महिलांपर्यंत पोहोचविण्यास मदत होणार आहे. नगर परिषद संचालनालयाने जारी केलेल्या सूचनांची काटेकोरपणे अंमलबजावणी करून नांदेड महानगरपालिकेने या उपक्रमात राज्यात अग्रेसर राहावे, अशी अपेक्षाही जोशी यांनी व्यक्त केली.
एकल महिलांना शासनाच्या विविध योजनांचा लाभ मिळण्यासाठी त्यांची अधिकृत नोंदणी व अद्ययावत माहिती महत्त्वाची ठरणार असून, मनपाने याबाबत तातडीने कार्यवाही करावी, अशी मागणी निवेदनातून करण्यात आली आहे.