हिमायतनगर, प्रतिनिधी| हुतात्मा जयवंतराव पाटील महाविद्यालय, हिमायतनगर येथे शनिवार (दि. १ ऑगस्ट २०२६) रोजी लोकशाहीर अण्णाभाऊ साठे यांच्या जयंतीनिमित्त ‘लेखन प्रेरणा दिन’ उत्साहात साजरा करण्यात आला. यानिमित्त महाविद्यालयाच्या ग्रंथालय विभागात अण्णाभाऊ साठे यांच्या साहित्यकृतींचे विशेष ग्रंथ प्रदर्शन आयोजित करण्यात आले.
कार्यक्रमाची सुरुवात महाविद्यालयाच्या प्राचार्या डॉ. उज्वला सदावर्ते यांच्या हस्ते ग्रंथ प्रदर्शनाचे उद्घाटन करून झाली. यावेळी स्टाफ सेक्रेटरी प्रा. एम. पी. गुंडाळे तसेच ग्रंथपाल राजू बोंबले यांनी अण्णाभाऊ साठे यांच्या समृद्ध साहित्यविश्वाची माहिती उपस्थितांना दिली.
प्रदर्शनामध्ये फकीरा, रशियाचा प्रवास, चित्रा, आवडी, पाझर यांसह अण्णाभाऊ साठे यांच्या विविध साहित्यकृतींचा समावेश करण्यात आला होता. विद्यार्थ्यांना या ग्रंथांचे महत्त्व समजावून सांगत वाचनाची प्रेरणा देण्याचा प्रयत्न यावेळी करण्यात आला.
या ग्रंथ प्रदर्शनास महाविद्यालयातील विद्यार्थी-विद्यार्थिनी, प्राध्यापक, शिक्षक तसेच शिक्षकेतर कर्मचारी मोठ्या संख्येने उपस्थित होते. कार्यक्रमातून विद्यार्थ्यांमध्ये वाचन संस्कृती रुजविण्यासह अण्णाभाऊ साठे यांच्या साहित्याचा परिचय करून देण्याचा उद्देश यशस्वीरीत्या साध्य झाला.
