हिमायतनगर, उत्कर्ष मादसवार| विदर्भ आणि मराठवाड्याच्या वरच्या भागात झालेल्या मुसळधार पावसामुळे पैनगंगा नदीच्या प्रवाहात मोठी वाढ झाली असून, महाराष्ट्रातील प्रसिद्ध पर्यटनस्थळ सहस्त्रकुंड धबधबा आता पूर्ण क्षमतेने कोसळू लागला आहे. उंच कड्यांवरून हजारो शुभ्र धारा फेसाळत खाली झेपावत असल्याने सहस्त्रकुंडचे रौद्र आणि मनमोहक रूप खुलून आले आहे. धबधब्याच्या गर्जनेसह परिसरात निर्माण झालेला निसर्गरम्य नजारा पाहण्यासाठी पर्यटकांची मोठी गर्दी होत आहे.
गेल्या तीन-चार दिवसांपासून सुरू असलेल्या रिमझिम आणि दमदार पावसामुळे संपूर्ण परिसर हिरवाईने नटला आहे. काळे ढग, डोंगररांगांवर दाटलेले धुके, पावसाच्या सरी आणि कडेकपाऱ्यांवरून कोसळणाऱ्या शुभ्र धारा यामुळे सहस्त्रकुंड परिसराचे सौंदर्य अधिकच खुलले आहे. हिमायतनगर, उमरखेड, नांदेड, यवतमाळ तसेच मराठवाडा आणि विदर्भातील विविध भागांतून पर्यटक मोठ्या संख्येने येथे दाखल होत असून, निसर्गाचा हा अद्भुत आविष्कार आपल्या कॅमेऱ्यात कैद करत आहेत.
धबधब्याचा वाढलेला प्रवाह आणि पैनगंगा नदीचा वेग लक्षात घेता प्रशासनाने पर्यटकांना सावधगिरी बाळगण्याचे आवाहन केले आहे. धोकादायक ठिकाणी सेल्फी काढणे, नदीपात्रात उतरणे किंवा संरक्षक कठड्यांपलीकडे जाणे टाळावे, असे प्रशासनाने स्पष्ट केले आहे. यंदाच्या पावसाने सहस्त्रकुंड धबधब्याला नवसंजीवनी मिळाली असून, पावसाळी पर्यटनाचा आनंद घेण्यासाठी हे ठिकाण पुन्हा एकदा पर्यटकांचे प्रमुख आकर्षण ठरत आहे.
