नांदेड, प्रतिनिधी| केळीच्या दरात झालेल्या मोठ्या घसरणीमुळे नांदेड जिल्ह्यातील केळी उत्पादक शेतकरी आर्थिक संकटात सापडले असून, न्याय्य भाव मिळावा आणि व्यापाऱ्यांच्या मनमानीला आळा बसावा यासाठी शेतकऱ्यांनी जिल्हाधिकाऱ्यांची भेट घेऊन तातडीच्या हस्तक्षेपाची मागणी केली आहे.
शेतकऱ्यांचे म्हणणे आहे की, उत्पादन खर्च सातत्याने वाढत असताना बाजारात केळीला मिळणारा भाव मात्र कोसळला आहे. त्यामुळे शेतकऱ्यांच्या हातात उत्पादन खर्चही निघत नसल्याची गंभीर परिस्थिती निर्माण झाली आहे. अनेक शेतकऱ्यांना कर्जाचा बोजा वाढला असून, केळी बागा टिकवणेही कठीण झाले आहे.
यावेळी शेतकरी शिष्टमंडळाने केळी दर नियंत्रणासाठी स्वतंत्र जिल्हास्तरीय समिती स्थापन करावी, व्यापारी आणि दलालांच्या व्यवहारात पारदर्शकता आणावी, तसेच शेतकऱ्यांना योग्य मोबदला मिळावा, अशी मागणी केली. शिष्टमंडळातील प्रतिनिधींनी सांगितले की, दर ठरविताना शेतकऱ्यांचा सहभाग नसल्याने व्यापाऱ्यांच्या मर्जीप्रमाणे व्यवहार होत आहेत. वाहतूक, हमाली, पॅकिंग, कमिशन आणि इतर खर्च वजा केल्यानंतर शेतकऱ्यांच्या हातात अत्यल्प रक्कम उरत आहे. त्यामुळे केळी उत्पादकांच्या अडचणी दिवसेंदिवस वाढत आहेत.
शेतकरी नेत्यांनी इशारा देत सांगितले की, केळी उत्पादकांच्या प्रश्नांकडे तातडीने लक्ष न दिल्यास जिल्हाभर तीव्र आंदोलन छेडण्यात येईल. जिल्हाधिकाऱ्यांनीही शेतकऱ्यांच्या मागण्यांवर सकारात्मक भूमिका घेऊन संबंधित विभागांशी समन्वय साधून योग्य तो निर्णय घेण्याचे आश्वासन दिल्याची माहिती शिष्टमंडळाने दिली.
“शेतकऱ्याला भाव नाही, मग शेती कशी टिकणार?”
उत्पादन खर्च वाढत असताना बाजारभाव घसरत असल्याने केळी उत्पादक हवालदिल झाले आहेत. शेतकरी वाचवायचा असेल तर बाजार व्यवस्थेत पारदर्शकता, दर नियंत्रण आणि शेतकऱ्यांना न्याय्य मोबदला देण्यासाठी प्रभावी यंत्रणा उभारणे काळाची गरज असल्याची भावना शेतकरी संघटनांनी व्यक्त केली आहे.