हिमायतनगर, प्रतिनिधी| आषाढी एकादशीच्या पावन पर्वानिमित्त जिल्हा परिषद केंद्रीय प्राथमिक शाळा, सवना ज. येथे ‘आनंददायी शनिवार’ उपक्रमांतर्गत भक्ती, संस्कार आणि अनुभवाधारित शिक्षणाचा अनोखा संगम अनुभवायला मिळाला. विद्यार्थ्यांच्या उत्स्फूर्त सहभागामुळे संपूर्ण शाळा परिसर विठ्ठलनामाच्या गजराने भक्तिमय झाला.
कार्यक्रमाची सुरुवात भगवान श्री विठ्ठल-रुक्मिणी यांच्या प्रतिमेचे पूजन करून करण्यात आली. त्यानंतर विद्यार्थ्यांनी टाळ-मृदंगाच्या गजरात ज्ञानदिंडी काढत संत ज्ञानेश्वर, संत तुकाराम, संत नामदेव आणि संत एकनाथ यांच्या विचारांचा जागर केला. अभंग गायन, भजन, संतवाणी, नामस्मरण आणि संतांच्या जीवनकार्याचे सादरीकरण करत विद्यार्थ्यांनी समाजप्रबोधनाचा संदेश दिला. “विठ्ठल विठ्ठल” आणि “ज्ञानोबा-तुकोबा”च्या जयघोषाने वातावरण भक्तिरसाने भारावून गेले. या उपक्रमाच्या माध्यमातून विद्यार्थ्यांना भारतीय संस्कृती, संतपरंपरा, सामाजिक समता, शिस्त, सामूहिकता, श्रद्धा आणि नैतिक मूल्यांची ओळख करून देण्यात आली. संतांचे विचार केवळ पुस्तकांपुरते मर्यादित न ठेवता त्यांचा प्रत्यक्ष अनुभव कृतीतून विद्यार्थ्यांना देण्याचा प्रयत्न करण्यात आला.
यावेळी मुख्याध्यापक सतीश परमेश्वर गोपतवाड यांनी विद्यार्थ्यांना मार्गदर्शन करताना सांगितले की, “विद्यार्थ्यांच्या मनात संस्कारांची बीजे रुजविण्यासाठी केवळ पाठ्यपुस्तकातील ज्ञान पुरेसे नसते. संतपरंपरेतील विचार, समाजहिताची भावना, शिस्त, सहकार्य आणि नैतिक मूल्ये विद्यार्थ्यांनी प्रत्यक्ष कृतीतून अनुभवणे ही काळाची गरज आहे. ‘आनंददायी शनिवार’सारख्या उपक्रमांमुळे विद्यार्थ्यांमध्ये भारतीय संस्कृतीबद्दल अभिमान, सामाजिक जाणीव, नेतृत्वगुण आणि मूल्यांची जपणूक होते.”
राष्ट्रीय शैक्षणिक धोरण २०२० अनुषंगाने अनुभवाधारित आणि आनंददायी शिक्षणाला चालना देण्याच्या उद्देशाने आयोजित करण्यात आलेल्या या उपक्रमामुळे विद्यार्थ्यांच्या सर्वांगीण विकासाला बळ मिळाले. शिक्षणासोबत संस्कार, मूल्यशिक्षण, भारतीय सांस्कृतिक वारशाचे जतन आणि सामाजिक एकात्मतेचा संदेश या कार्यक्रमातून प्रभावीपणे देण्यात आला. या कार्यक्रमाला मुख्याध्यापक सतीश परमेश्वर गोपतवाड, सहशिक्षिका रेखा कदम, सहशिक्षक मनोहर शितळे, मालोजी शिंदे, विजयश्री भोसले, तसेच ग्रामस्थ, पालक आणि विद्यार्थी मोठ्या संख्येने उपस्थित होते. विद्यार्थ्यांच्या उत्स्फूर्त सहभागामुळे हा कार्यक्रम भक्तिमय, आनंददायी आणि प्रेरणादायी वातावरणात यशस्वीरीत्या संपन्न झाला.
