नांदेड| परिवहन विभागाच्या ‘सारथी 4.0’ आणि ‘वाहन 4.0’ या ऑनलाइन प्रणालीद्वारे नागरिकांना वाहन परवाना व वाहन नोंदणीसंदर्भातील 58 फेसलेस सेवा आता घरबसल्या उपलब्ध झाल्या आहेत. या सेवांमुळे कार्यालयात न जाता ऑनलाइन अर्ज करून मंजुरीची प्रक्रिया पूर्ण करता येत असल्याची माहिती उप प्रादेशिक परिवहन अधिकारी प्रशांतराव साळी यांनी दिली.
परिवहन विभागाच्या 115 अधिसूचित सेवांपैकी 89 सेवा ऑनलाइन उपलब्ध असून, त्यातील 58 सेवा पूर्णपणे फेसलेस आहेत. नागरिकांनी अर्ज करताना केवळ अधिकृत शासकीय शुल्कच भरावे आणि कोणत्याही अनधिकृत मध्यस्थाला अतिरिक्त पैसे देऊ नयेत, असे आवाहन करण्यात आले आहे.
नांदेड प्रादेशिक परिवहन कार्यालयात नागरिकांच्या मार्गदर्शनासाठी माहिती व मदत कक्ष सुरू करण्यात आला असून, अतिरिक्त शुल्काची मागणी झाल्यास तात्काळ आरटीओ कार्यालयाशी संपर्क साधण्याचे आवाहनही करण्यात आले आहे.
