हिमायतनगर, अनिल मादसवार| नांदेड जिल्ह्यातील विष्णुपुरी येथील राष्ट्रीय महामार्गावरील पुलाचा भराव ढासळल्याची घटना ताजी असतानाच हिमायतनगर तालुक्यातील वाघी–कामारी नाल्यावरील नव्याने बांधण्यात आलेल्या पुलाच्या गुणवत्तेबाबत गंभीर प्रश्नचिन्ह निर्माण झाले आहे. पुलाच्या कॉलममधील काँक्रीट दगडाने आणि हाताने सहज निघत असल्याचा दावा करणारा एक व्हिडिओ सोशल मीडियावर व्हायरल झाला असून, यामुळे नागरिकांमध्ये संताप व्यक्त होत आहे.
स्थानिक नागरिकांच्या म्हणण्यानुसार, नुकतेच पूर्ण झालेल्या पुलाच्या खांबावरील काँक्रीट सहज तुटत असल्याने बांधकामाच्या दर्जाबाबत शंका निर्माण झाली आहे. अशा परिस्थितीत या पुलावरून एखादे अवजड वाहन गेल्यास मोठी दुर्घटना होण्याची भीती व्यक्त केली जात आहे.
या कामात संबंधित विभागाचे अभियंते आणि ठेकेदार यांची कथित संगनमत असल्याचा आरोपही काही नागरिकांनी केला आहे. सार्वजनिक निधीतून उभारण्यात आलेल्या या पुलाच्या कामाकडे संबंधित बांधकाम विभागाने दुर्लक्ष केल्याचा आरोप होत असून, निकृष्ट दर्जाच्या कामामुळे नागरिकांच्या जीवाशी खेळ सुरू असल्याची भावना व्यक्त केली जात आहे.
व्हायरल झालेल्या व्हिडिओची तसेच पुलाच्या गुणवत्तेची स्वतंत्र तांत्रिक (Quality Audit) तपासणी करून बांधकामाची मजबुती तपासावी, अशी मागणी जोर धरत आहे. तपासणीत अनियमितता किंवा निकृष्ट दर्जाचे काम आढळल्यास संबंधित ठेकेदार, कामाची देखरेख करणारे अभियंते आणि जबाबदार अधिकाऱ्यांवर कठोर प्रशासकीय व फौजदारी कारवाई करावी, अशी मागणी नागरिकांनी केली आहे.
दरम्यान, भविष्यात या पुलामुळे कोणतीही दुर्घटना घडल्यास त्याची संपूर्ण जबाबदारी संबंधित ठेकेदार आणि देखरेख करणाऱ्या अधिकाऱ्यांवर निश्चित करण्यात यावी, अशीही मागणी पुढे येत आहे.