नांदेड | नांदेड शहरातील विमानतळ पोलीस ठाणे हद्दीत शनिवारी मध्यरात्रीनंतर एका तरुणाची धारदार शस्त्राने वार करून निर्घृण हत्या करण्यात आल्याची धक्कादायक घटना घडली. या घटनेमुळे परिसरात भीतीचे वातावरण निर्माण झाले असून शहरातील कायदा व सुव्यवस्थेचा प्रश्न पुन्हा ऐरणीवर आला आहे.
मृत तरुणाची ओळख सचिन यशवंत काळे (वय २४–२५, रा. नुरी चौक, नांदेड) अशी झाली आहे. प्राथमिक माहितीनुसार, अज्ञात हल्लेखोरांनी सचिन यांच्यावर चाकूने सपासप वार केले. गंभीर जखमी झालेल्या सचिन यांचा घटनास्थळीच मृत्यू झाला.
घटनेची माहिती मिळताच अपर पोलीस अधीक्षक सूरज गुरव यांच्यासह विमानतळ पोलीस ठाण्याचे अधिकारी व कर्मचारी तातडीने घटनास्थळी दाखल झाले. पोलिसांनी पंचनामा करून तपासाची चक्रे वेगाने फिरवली आहेत.
आरोपींचा माग काढण्यासाठी परिसरातील सीसीटीव्ही फुटेज जप्त करण्यात आले असून तांत्रिक पुरावे आणि प्रत्यक्षदर्शींच्या जबाबांच्या आधारे तपास सुरू आहे. हत्येमागे नेमके कारण काय, वैयक्तिक वाद, जुने वैमनस्य की अन्य कोणते कारण आहे, याचा पोलीस सर्व बाजूंनी तपास करत आहेत.
दरम्यान, भरवस्तीत घडलेल्या या खुनामुळे नांदेड शहरात पुन्हा एकदा खळबळ उडाली आहे. नागरिकांनी वाढत्या गुन्हेगारीबाबत चिंता व्यक्त करत आरोपींना तातडीने अटक करून कठोर कारवाई करण्याची मागणी केली आहे. पोलीस तपास सुरू असून हत्येमागील नेमके कारण अद्याप स्पष्ट झालेले नाही.