कृत्रिम अवयव, श्रवणयंत्र, कॅलिपर्ससह विविध साहित्याचा लाभ; आमदार बाबुराव कदम कोहळीकर यांच्या पुढाकाराने आयोजन
हिमायतनगर, उत्कर्ष मादसवार| दिव्यांग बांधवांच्या सक्षमीकरणासाठी आज (दि. २८ जून) हिमायतनगर येथे मोफत सहाय्य साहित्य वितरण शिबिराचे आयोजन करण्यात आले आहे. या शिबिरात कृत्रिम पाय, कृत्रिम हात, कॅलिपर्स, श्रवणयंत्र तसेच इतर आवश्यक सहाय्य साहित्याचे मोफत वितरण करण्यात येणार आहे.
एसआर ट्रस्ट, मध्यप्रदेश आणि ALIMCO, मुंबई यांच्या संयुक्त विद्यमाने आयोजित या उपक्रमाला परिसरातील दिव्यांग नागरिकांकडून उत्स्फूर्त प्रतिसाद मिळत आहे. शिबिर सकाळी १० ते सायंकाळी ५ या वेळेत होणार असून लाभार्थ्यांनी आधार कार्ड, रेशन कार्ड आणि दिव्यांग प्रमाणपत्रासह उपस्थित राहण्याचे आवाहन आयोजकांनी केले आहे.
हदगाव-हिमायतनगर विधानसभा मतदारसंघाचे आमदार बाबुराव कदम कोहळीकर यांच्या पुढाकारातून हा सामाजिक उपक्रम राबविण्यात येत असून, दिव्यांग बांधवांना स्वावलंबी बनविण्याच्या दृष्टीने हे शिबिर महत्त्वपूर्ण ठरणार असल्याचे मत व्यक्त करण्यात येत आहे.
या शिबिराच्या माध्यमातून गरजू दिव्यांग व्यक्तींना आवश्यक सहाय्य साहित्य उपलब्ध होणार असल्याने त्यांच्या दैनंदिन जीवनात सकारात्मक बदल घडण्यास मदत होणार आहे. त्यामुळे पात्र दिव्यांग बांधवांनी या संधीचा लाभ घ्यावा, असे आवाहन आयोजकांनी केले आहे.
