विमानतळ, इतवारा व मांडवी पोलिसांची संयुक्त कारवाई; ११ जनावरांची सुटका, सहा आरोपींवर गुन्हे
नांदेड | ऑपरेशन क्रॅकडाऊन अंतर्गत नांदेड पोलिसांनी अवैध जनावर वाहतुकीविरोधात मोठी कारवाई करत ११ लाख २६ हजार रुपयांचा मुद्देमाल जप्त केला आहे. विमानतळ, इतवारा व मांडवी पोलीस ठाण्यांच्या पथकांनी स्वतंत्र कारवायांमध्ये ११ गोवंश व महेस जातीच्या जनावरांची सुटका केली असून, या प्रकरणी सहा आरोपींविरुद्ध विविध कायद्यांन्वये गुन्हे दाखल करण्यात आले आहेत.
पोलीस अधीक्षक अविनाश कुमार, अपर पोलीस अधीक्षक अर्चना पाटील (भोकर) व सुरज गुरव (नांदेड) यांच्या मार्गदर्शनाखाली ही कारवाई करण्यात आली. अवैध जनावर वाहतुकीवर कठोर कारवाई करण्याच्या आदेशानुसार संबंधित पोलीस ठाण्यांच्या पथकांनी गोपनीय माहितीच्या आधारे २४ मे रोजी छापे टाकले.
विमानतळ पोलीस ठाणे हद्दीत आबना ओव्हरब्रिज रोड परिसरात कारवाई करत निजामाबाद (तेलंगणा) येथील दोन आरोपींना ताब्यात घेण्यात आले. येथे तीन गोवंश जनावरे व एक बोलेरो पिकअप वाहन जप्त करण्यात आले.
इतवारा पोलीस ठाणे हद्दीत खुसरो नगर परिसरात छापा टाकून चार महेस जनावरे अवैधरित्या वाहतूक करताना आढळून आली. या प्रकरणी देवीनगर तांडा, हदगाव व इतवारा येथील दोन आरोपींवर गुन्हा दाखल करण्यात आला. तर मांडवी पोलीस ठाणे हद्दीत किनवट रोडवर कारवाई करत टाटा एस वाहनातून चार गोवंश जनावरे निर्दयीपणे वाहतूक करताना पकडण्यात आली. या कारवाईत दोन आरोपींना ताब्यात घेण्यात आले.
पोलिसांनी कारवाईदरम्यान बोलेरो पिकअप, टाटा एस वाहन, गोवंश व महेस जनावरे असा एकूण ११ लाख २६ हजार रुपयांचा मुद्देमाल जप्त केला असून, जनावरांची सुटका करण्यात आली आहे. या धडक कारवाईबद्दल संबंधित पोलीस अधिकारी व अंमलदारांचे पोलीस अधीक्षक अविनाश कुमार यांनी कौतुक व अभिनंदन केले आहे.
