नांदेड| येथील स्त्री रुग्णालयात आरोग्य विभाग, महाराष्ट्र शासनाच्या वतीने राबविण्यात आलेल्या ‘एक पाऊल थॅलेसेमिया मुक्तीकडे’ अभियानाचा उत्साहात समारोप करण्यात आला. दि. १ ते ८ मे दरम्यान ‘संकल्प सप्ताह’ अंतर्गत विविध जनजागृती आणि आरोग्यविषयक उपक्रमांचे आयोजन करण्यात आले होते.
या अभियानाचा शुभारंभ वैद्यकीय अधीक्षक डॉ सुनील पिल्लेवाड (Dr. Sunil Pallewad) यांच्या अध्यक्षतेखाली झाला. यावेळी जिल्हा रुग्णालयाच्या विकृती शास्त्रज्ञ डॉ पद्मावती येडपलवार (Dr. Padmavati Yedpalwar) यांची प्रमुख उपस्थिती होती.
अभियानादरम्यान गरोदर माता तसेच 18 ते 35 वयोगटातील युवक-युवतींची थॅलेसेमिया तपासणी करण्यात आली. संशयित रुग्णांची विशेष तपासणी करून त्यांना पुढील उपचारासाठी मार्गदर्शन करण्यात आले. तसेच थॅलेसेमियाग्रस्त मुलांच्या पालकांना उपचार, आहार आणि आवश्यक काळजीबाबत तज्ज्ञ डॉक्टरांनी माहिती दिली.
रुग्णालयामार्फत थॅलेसेमिया रुग्णांना मोफत वैद्यकीय सेवा आणि नियमित रक्तपुरवठा उपलब्ध करून दिला जात असल्याची माहिती यावेळी देण्यात आली. सप्ताहादरम्यान रक्तदान शिबिरे, शाळा-महाविद्यालयांमध्ये जनजागृतीपर व्याख्याने तसेच प्रसार माध्यमांच्या माध्यमातून थॅलेसेमियामुक्तीचा संदेश नागरिकांपर्यंत पोहोचविण्यात आला.
या अभियानाच्या यशस्वीतेसाठी जिल्हा शल्य चिकित्सक Dr. Sanjay Perke, निवासी वैद्यकीय अधिकारी डॉ. बुट्टे, डॉ. मोहिनी पाटील, दत्तात्रय भोसले, ज्योती गादेकर, दिपाली इंगोले यांच्यासह स्त्री रुग्णालयातील सर्व अधिकारी व कर्मचाऱ्यांनी विशेष परिश्रम घेतले.
“थॅलेसेमिया हा प्रतिबंधात्मक आजार असून वेळीच तपासणी आणि जनजागृतीद्वारे येणारी पिढी या आजारापासून मुक्त ठेवता येऊ शकते,” असा संदेश यावेळी देण्यात आला.