हिमायतनगर, उत्कर्ष मादसवार| हिमायतनगर शहरातील नागरिकांना सुरळीत वीज पुरवठा मिळावा यासाठी ऊन पावसाची तमा न बाळगता अहोरात्र झटणारे परमेश्वर शिंदे यांच्या प्रामाणिक व निष्ठावंत कार्याचा गौरव करत राज्य मराठी पत्रकार परिषदेतर्फे त्यांना ‘सेवागौरव’ पुरस्कार प्रदान करण्यात आला.
डॉ. बाबासाहेब आंबेडकर यांच्या १३५ व्या जयंतीनिमित्त हिमायतनगर येथील श्री परमेश्वर मंदिर मैदानात आयोजित सांस्कृतिक कार्यक्रमात हा सन्मान सोहळा पार पडला. या वेळी राज्य मराठी पत्रकार परिषदेचे केंद्रीय अध्यक्ष मधुसूदन कुलथे यांच्या हस्ते लाईनमन श्री परमेश्वर शिंदे यांना पुरस्कार प्रदान करण्यात आला.
वीजपुरवठा सुरळीत ठेवण्यासाठी कोणत्याही परिस्थितीत तत्पर राहून सेवा देणाऱ्या शिंदे यांच्या कार्याची शहरात विशेष दखल घेतली जात आहे. नागरिकांच्या अडचणी सोडवण्यासाठी त्यांनी केलेले योगदान प्रेरणादायी असल्याचे मत उपस्थितांनी व्यक्त केले. या सन्मानामुळे त्यांच्या कार्याला नवे बळ मिळणार असून, भविष्यातही ते जनतेच्या सेवेत अधिक जोमाने कार्यरत राहतील, असा विश्वास व्यक्त करण्यात येत आहे.
