नांदेड| ध्यान आणि मानवतावादी मूल्यांवर आधारित वॉट फ्रा धम्मकाया संस्थेच्या कार्यामुळे बौद्ध शिकवणींना आंतरराष्ट्रीय स्तरावर नवा दृष्टिकोन प्राप्त झाला आहे, असे प्रतिपादन भदंत पंय्याबोधी थेरो यांनी केले.
ते थायलंड येथील धम्मकाया सेंटरमध्ये वसुंधरा दिन निमित्त आयोजित कार्यक्रमात बोलत होते. या कार्यक्रमाला जगभरातील सुमारे एक लाख भिक्षू आणि नऊ लाख बौद्ध उपासक-उपासिकांची उपस्थिती होती.
यावेळी त्यांनी सांगितले की, लुंग पोर धम्मजायो यांच्या शिकवणीमुळे ध्यान हे केवळ धार्मिक मर्यादेत न राहता सर्व धर्मीयांसाठी तसेच धर्मनिरपेक्ष पद्धतीने स्वीकारता येणारे साधन म्हणून विकसित झाले आहे. त्यामुळे जागतिक स्तरावर बौद्ध विचारांचा प्रसार अधिक व्यापक झाला आहे.
वर्ल्ड अलायन्स ऑफ बुद्धिस्ट्स आणि वर्ल्ड बुद्धिस्ट संघ फोरम यांच्या वतीने आयोजित या विशेष कार्यक्रमात धम्मजयो यांच्या ८२ व्या जयंतीनिमित्त तसेच पृथ्वी दिनानिमित्त “Our Power Our Planet” या संकल्पनेवर भर देण्यात आला.
या सोहळ्याचा उद्देश जागतिक बौद्ध समुदायाला एकत्र आणून अंतःशांती, पर्यावरण संवर्धन आणि पृथ्वीच्या कल्याणासाठी सामूहिक जबाबदारीची जाणीव निर्माण करणे हा होता. कार्यक्रमात विविध धार्मिक विधी पार पडले. यावेळी भदंत दत्ताजीओ यांनी भदंत पंय्याबोधी थेरो यांना तथागत गौतम बुद्ध यांची मूर्ती प्रदान केली.