नांदेड (प्रतिनिधी) नांदेड शहरात सुरू असलेल्या “माँ गंगा गोदावरी शुद्धीकरण संकल्प अभियान” अंतर्गत वचनपूर्तीचा 128 वा आठवडा रविवारी (दि. 26 एप्रिल 2026) यशस्वीरीत्या पूर्ण झाला. या उपक्रमात श्री स्वामी समर्थ मंदिर व अन्नछत्र, सोमेश कॉलनी येथील स्वयंसेवकांसह नांदेड वाघाळा महानगरपालिकेच्या स्वच्छता विभागाने सक्रिय सहभाग नोंदवला.
यावेळी महानगरपालिकेचे आयुक्त महेशकुमार डोईफोडे यांनी अचानक गोदावरी तटावर भेट देऊन स्वच्छता मोहिमेची पाहणी केली. त्यांनी संबंधित अधिकाऱ्यांशी संवाद साधत स्वच्छता अधिक प्रभावीपणे राबविण्याच्या सूचना दिल्या.
अभियानाच्या उद्दिष्टांबाबत व भविष्यातील नियोजनावरही यावेळी सविस्तर चर्चा करण्यात आली. या उपक्रमामुळे गोदावरी नदी परिसर स्वच्छ व सुंदर राखण्यास मोठा हातभार लागत असल्याची भावना उपस्थितांनी व्यक्त केली. अशी माहिती ज्येष्ठ स्वयंसेवक तथा नेहरू इंग्लिश स्कूलचे प्रधानाचार्य संजय शर्मा यांनी दिली.
