अहमदपूर/जि. लातूर | अवैध व्यवसायांवर आळा घालण्यासाठी नांदेड परिक्षेत्रातील विशेष पथकाने अहमदपूर येथे मोठी कारवाई करत जुगार अड्ड्यावर धाड टाकली. या कारवाईत 16 जणांना ताब्यात घेऊन त्यांच्याविरुद्ध गुन्हा दाखल करण्यात आला असून, सुमारे 5 लाख 87 हजार 750 रुपयांचा मुद्देमाल जप्त करण्यात आला आहे.
पोलीस उपमहानिरीक्षक शहाजी उमाप यांच्या मार्गदर्शनाखाली ही कारवाई करण्यात आली. अहमदपूर तालुक्यातील काजळ हिप्परगा येथील विसावा बारच्या दुसऱ्या मजल्यावर ‘तिरंट’ नावाचा जुगार सुरू असल्याची गोपनीय माहिती पथकाला मिळाली होती.या माहितीच्या आधारे दिनांक 25 एप्रिल 2026 रोजी छापा टाकण्यात आला. छाप्यात 16 इसम जुगार खेळताना रंगेहात आढळले. त्यांच्याकडून ₹1,44,750 रोख रक्कम, ₹1,03,000 किमतीचे 14 मोबाईल, ₹3,40,000 किमतीच्या 6 मोटारसायकली असा एकूण मुद्देमाल जप्त करण्यात आला.
या प्रकरणी अहमदपूर पोलीस ठाण्यात गुन्हा क्रमांक 233/2026 अंतर्गत महाराष्ट्र जुगार कायद्याच्या कलम 4 व 5 नुसार गुन्हा नोंदविण्यात आला असून, पुढील तपास पोलीस उपनिरीक्षक स्मिता जाधव यांच्याकडे सोपविण्यात आला आहे. या धाडसी कारवाईत पोलीस उपनिरीक्षक पंकज इंगळे यांच्यासह पोलीस कर्मचारी प्रदीप खानसोळे, संजीव जिंकलवाड, गणेश धुमाळ आणि कामाजी गवळी यांनी सहभाग घेतला. पथकाच्या या उल्लेखनीय कामगिरीबद्दल पोलीस उपमहानिरीक्षक शहाजी उमाप यांनी सर्वांचे अभिनंदन केले आहे. दरम्यान, परिक्षेत्रातील अवैध व्यवसायांविरोधात माहिती देण्यासाठी सुरू करण्यात आलेल्या ‘खबर’ हेल्पलाईन (9150100100) वर नागरिकांनी गोपनीय माहिती देण्याचे आवाहनही करण्यात आले आहे.
