हदगाव, गौतम वाठोरे| हदगाव–हिमायतनगर विधानसभा मतदारसंघाचे आमदार बाबूराव कदम कोहळीकर यांनी दिलेला शब्द पाळत हरडफ–देवसरी या महत्त्वाच्या रस्त्यासाठी तब्बल ५० लाख रुपयांचा निधी मंजूर केला असून कामालाही प्रत्यक्ष सुरुवात झाली आहे. या निर्णयामुळे परिसरातील नागरिकांमध्ये समाधानाचे वातावरण आहे.
या रस्त्याच्या मंजुरीसाठी युवानेते शरद कदम यांनी सातत्याने पाठपुरावा केला. गावातील रस्त्याची दुरवस्था, नागरिकांची गैरसोय याकडे त्यांनी वारंवार आमदारांचे लक्ष वेधले होते. त्यांच्या या प्रयत्नांना अखेर यश मिळाले असून विकासकामांना गती मिळाली आहे.
हरडफ ते देवसरी हा रस्ता विदर्भ आणि मराठवाड्याला जोडणारा महत्त्वाचा दुवा मानला जातो. या रस्त्यामुळे दोन्ही विभागांतील नागरिकांना दळणवळणाची मोठी सोय उपलब्ध होणार आहे. केवळ निधी मंजूर करून न थांबता, आमदारांनी काम तातडीने सुरू करण्याचे आदेश दिले असून सध्या काम युद्धपातळीवर सुरू आहे.
या रस्त्यामुळे परिसरातील शेतकरी, व्यापारी तसेच विद्यार्थ्यांना मोठा दिलासा मिळणार आहे. प्रवासाचा वेळ कमी होऊन स्थानिक व्यवसायांना चालना मिळेल, अशी अपेक्षा व्यक्त होत आहे. कामाचा वेग आणि दर्जा लक्षात घेता लवकरच या रस्त्याचे लोकार्पण होण्याची शक्यता असून, या विकासकामासाठी आ. बाबूराव कदम कोहळीकर आणि पाठपुरावा करणारे युवानेते शरद कदम यांचे हरडफ–देवसरी परिसरातील नागरिकांनी आभार मानले आहेत.
