नांदेड | नांदेड जिल्ह्यात हरवलेले व चोरीस गेलेले मोबाईल शोधण्यासाठी राबविण्यात आलेल्या विशेष मोहिमेत सायबर पोलिसांनी उल्लेखनीय यश मिळवले आहे. या मोहिमेत ३०३ अँड्रॉइड मोबाईल फोन हस्तगत करण्यात आले असून त्यांची एकूण किंमत ₹४६,०३,००० इतकी आहे.
मा. पोलीस अधीक्षक यांच्या आदेशानुसार सायबर पोलीस स्टेशन, स्थानिक गुन्हे शाखा व जिल्ह्यातील सर्व पोलीस ठाण्यांच्या संयुक्त पथकाने ही मोहीम राबवली. जानेवारी २०२६ पासून सुरू असलेल्या या मोहिमेत विविध ठिकाणांहून हरवलेले व चोरीस गेलेले मोबाईल शोधून काढण्यात आले.
हस्तगत करण्यात आलेले सर्व मोबाईल आज मिशन सहयोग व मिशन समाधान अंतर्गत जिल्ह्याचे पालकमंत्री अतुल सावे यांच्या हस्ते संबंधित नागरिकांना परत करण्यात आले. तसेच, सापडलेल्या मोबाईलचे IMEI क्रमांक “Nanded Police” या अधिकृत फेसबुक पेजवर प्रसिद्ध करण्यात आले आहेत.
सन २०२५ मध्ये: ८०० मोबाईल हस्तगत, अंदाजे ₹१.३७ कोटींची वसुली करण्यात आली होती. ही कारवाई पोलीस अधीक्षक अविनाश कुमार, अपर पोलीस अधीक्षक डॉ. अर्चना पाटील, सुरज गुरव, पोलीस उपअधीक्षक डॉ. अश्विनी जगताप व पोलीस निरीक्षक वसंत सप्रे यांच्या मार्गदर्शनाखाली पार पडली. सायबर पोलिसांच्या पथकातील अधिकारी व कर्मचाऱ्यांनी या मोहिमेत महत्त्वाची भूमिका बजावली.
हरवलेले किंवा चोरीस गेलेले मोबाईल शोधण्यासाठी नागरिकांनी CEIR पोर्टलवर त्वरित नोंद करावी, असे आवाहन पोलीस प्रशासनाने केले आहे. या उत्कृष्ट कामगिरीबद्दल पालकमंत्री अतुल सावे यांनी संपूर्ण पथकाचे अभिनंदन केले आहे.