नांदेड| स्थानिक गुन्हे शाखा (LCB) नांदेडने अंमली पदार्थांविरोधात धडक कारवाई करत सुमारे ₹1 लाख 12 हजार किमतीचा 2 किलो 251 ग्रॅम गांजा जप्त केला आहे. या प्रकरणी एका आरोपीला ताब्यात घेण्यात आले असून दुसऱ्या आरोपीचाही तपास सुरू आहे.
पोलीस अधीक्षक अविनाश कुमार यांच्या मार्गदर्शनाखाली ‘ऑपरेशन फ्लश आऊट’ अंतर्गत ही कारवाई करण्यात आली. स्थानिक गुन्हे शाखेच्या पथकाला शंकरराव चव्हाण चौक परिसरात एक इसम गांजाची विक्री करत असल्याची गोपनीय माहिती मिळाली होती.
17 एप्रिल रोजी सायंकाळी सुमारे 7.45 वाजता महशीचा बाजार परिसरात छापा टाकण्यात आला. यावेळी संशयास्पद हालचाल करणाऱ्या इसमाची झडती घेतली असता त्याच्याकडून प्लास्टिक पिशवीत ठेवलेला गांजा जप्त करण्यात आला. आरोपी सय्यद सदरु सय्यद सलीम (वय 29, रा. सांगवी, नांदेड), शेख शफी (रा. महेबूबनगर, नांदेड) त्यांच्याकडून 2 किलो 251 ग्रॅम गांजा अंदाजे किंमत ₹1,12,550 मुद्देमाल जप्त करण्यात आला.
या प्रकरणी आरोपी विरुद्ध विमानतळ पोलीस ठाण्यात NDPS अॅक्ट 1985 च्या कलम 8(क), 20(b), 29 अंतर्गत गुन्हा क्रमांक 154/2026 नोंदविण्यात आला आहे. आरोपीकडून गांजाचा पुरवठा कोठून होत होता, याचा तपास सुरू असून पोलिसांनी अंमली पदार्थांच्या साखळीचा पर्दाफाश करण्यासाठी तपासाची व्याप्ती वाढवली आहे. या यशस्वी कारवाईबद्दल संबंधित पोलीस अधिकारी व कर्मचाऱ्यांचे वरिष्ठांकडून कौतुक करण्यात आले आहे.
