नांदेड (प्रतिनिधी) डॉ. बाबासाहेब आंबेडकर यांच्या १३५ व्या जयंतीनिमित्त आणि चवदार तळे सत्याग्रह शताब्दी वर्षानिमित्त ‘बुद्धम् शरणम् गच्छामि’ या संगीतमय महानाट्याचे आयोजन करण्यात आले आहे. हा कार्यक्रम १८ एप्रिल रोजी सायंकाळी ७ वाजता नांदेड येथील सायन्स कॉलेज मधील स्व. पुरणमलजी लाहोटी सभागृहात होणार आहे.
या महानाट्याचे उद्घाटन नांदेडचे पोलीस अधीक्षक अबीनाश कुमार यांच्या हस्ते होणार असून ते प्रमुख मार्गदर्शक म्हणून उपस्थितांना संबोधित करणार आहेत.
हैदराबाद येथील अभ्यूदय आर्टस् एकादमी प्रस्तुत या महानाट्यात डॉ. बाबासाहेब आंबेडकर यांच्या संघर्षमय जीवनाची प्रभावी मांडणी हिंदी भाषेत करण्यात येणार आहे. या नाट्यात हैदराबादमधील २२ कलाकारांचा सहभाग असून त्यांनी देशभर विविध ठिकाणी प्रयोग सादर केले आहेत.
या कार्यक्रमास सहयोग राशी कुपनधारक तसेच डॉ. बाबासाहेब आंबेडकर प्रेमींनी मोठ्या संख्येने उपस्थित राहावे, असे आवाहन आयोजन समितीच्या वतीने करण्यात आले आहे. अशी माहिती समन्वयक कॉ. गंगाधर गायकवाड यांनी दिली आहे.
