नांदेड, हिंगोली, वाशिम, यवतमाळ परिसरात जाणवले कंप; कोणतीही हानी नाही
नांदेड| आज सकाळी सुमारे ८ वाजून ४५ ते ४६ मिनिटांच्या दरम्यान मराठवाडा आणि विदर्भातील काही भागांमध्ये भूकंपाचे सौम्य धक्के जाणवले. या अचानक झालेल्या कंपामुळे नागरिक काही काळ घाबरून घराबाहेर पडले, मात्र सुदैवाने कोणतीही जीवित किंवा वित्तीय हानी झाल्याचे वृत्त नाही.
वाशिम शहरासह परिसरात सकाळी ८.४५ वाजता हलके धक्के जाणवले. यवतमाळ जिल्ह्यातील पुसद तालुक्यातील शेबाळपिंपरी भागातही त्याच वेळेत भूकंपाचा कंप जाणवला. नांदेड शहर आणि आसपासच्या भागात हा धक्का सुमारे ८.४६ वाजता जाणवला असल्याची माहिती नागरिकांनी दिली.
भूकंपाच्या वेळी काही नागरिकांनी भूगर्भातून आवाज येऊन जमीन हलल्याचा अनुभव सांगितला. अचानक झालेल्या या घटनेमुळे काही काळ भीतीचे वातावरण निर्माण झाले होते. मात्र काही मिनिटांत परिस्थिती पूर्ववत झाली.
दरम्यान, National Center for Seismology कडून भूकंपाची तीव्रता (मॅग्निट्यूड) आणि केंद्रबिंदू याबाबत अधिकृत माहिती अद्याप समोर आलेली नाही. प्राथमिक माहितीनुसार हा धक्का सौम्य स्वरूपाचा असल्याचे सांगितले जात आहे.
विदर्भ–मराठवाडा हा भूकंपप्रवण पट्टा मानला जात असल्याने अशा सौम्य घटना अधूनमधून घडत असतात. प्रशासनाने नागरिकांना सतर्क राहण्याचे तसेच कोणत्याही अफवांवर विश्वास न ठेवण्याचे आवाहन केले आहे.
