देगलूर, गंगाधर मठवाले| बस प्रवासादरम्यान सापडलेला महागडा टॅब स्वतःकडे न ठेवता तो पोलिसांकडे सुपूर्द करून इयत्ता दहावीतील विद्यार्थी पांडुरंग वसंत सूर्यवंशी याने प्रामाणिकपणाचा आदर्श घालून दिला आहे. त्याच्या या कृतीचे पोलीस प्रशासनासह देगलूर तालुक्यात कौतुक होत आहे.
पांडुरंग सूर्यवंशी हा वझरगा येथील रहिवासी असून, देगलूर येथील मानव्य विकास विद्यालयात इयत्ता दहावीमध्ये शिक्षण घेत आहे. सोमवार, दि. ५ ऑक्टोबर रोजी शाळा सुटल्यानंतर तो बसने वझरगा येथे घरी परतत होता. प्रवासादरम्यान बसच्या सीटवर एक महागडा टॅब बेवारस अवस्थेत पडलेला त्याच्या निदर्शनास आला. टॅब सापडल्यानंतर तो स्वतःकडे ठेवण्याऐवजी मूळ मालकापर्यंत पोहोचविण्याचा निर्णय पांडुरंगने घेतला. घरी पोहोचल्यानंतर त्याने याबाबत कुटुंबीयांना माहिती दिली.
त्यानंतर मंगळवारी सकाळी पांडुरंगने वडील वसंत सूर्यवंशी यांच्यासोबत उपविभागीय पोलीस अधिकारी किरण पोपळघट यांच्या कार्यालयात जाऊन हा टॅब परिविक्षाधीन पोलीस अधिकारी वैभव पडवळ यांच्या स्वाधीन केला. यावेळी DySP किरण पोपळघट उपस्थित होते. विद्यार्थ्याने दाखविलेली सचोटी आणि सामाजिक भान पाहून किरण पोपळघट व वैभव पडवळ यांनी पांडुरंग सूर्यवंशी आणि त्याच्या पालकांचे विशेष कौतुक केले.
दरम्यान, सापडलेला टॅब पोलिसांकडे जमा करण्यात आला आहे. हा टॅब कोणाचा गहाळ झाला असेल, त्या मूळ मालकाने आवश्यक कागदपत्रे व खात्रीशीर पुरावे घेऊन देगलूर पोलीस ठाण्याशी संपर्क साधावा, असे आवाहन पोलीस प्रशासनाने केले आहे. पांडुरंगच्या या प्रामाणिकपणाची सध्या वझरगा तसेच देगलूर परिसरात कौतुकाने चर्चा होत असून, विद्यार्थ्याच्या या कृतीतून सामाजिक भान आणि प्रामाणिकपणाचा आदर्श समोर आला आहे.
