नांदेड पोलिसांची मोठी कारवाई
नांदेड | नांदेड जिल्हा पोलिसांच्या गुन्हे शोध पथकाने चोरीच्या गुन्ह्याचा यशस्वी छडा लावत दोन महिला आरोपींना अटक केली असून, त्यांच्याकडून सुमारे २४ लाख रुपये किमतीचे १६० ग्रॅम वजनाचे सोन्याचे दागिने जप्त करण्यात आले आहेत. ही कारवाई पोलिस अधीक्षक नीलोत्पल यांच्या मार्गदर्शनाखाली करण्यात आली.
पोलिसांनी दिलेल्या माहितीनुसार, भाग्यनगर पोलीस ठाण्यात दाखल असलेल्या चोरीच्या गुन्ह्याचा तपास सुरू असताना गुन्हे शोध पथकाला गोपनीय माहिती मिळाली. त्यानुसार सापळा रचून दोन संशयित महिलांना ताब्यात घेण्यात आले. चौकशीदरम्यान त्यांनी चोरीची कबुली दिल्यानंतर त्यांच्याकडून चोरीतील १६० ग्रॅम सोन्याचे दागिने जप्त करण्यात आले.
या प्रकरणी लक्ष्मी गणेशराव साखरे उर्फ मंजू रेड्डी (वय ४६) आणि पूजा सोनु उर्फ लक्केपा साखरे (वय २६) या दोन्ही महिला आरोपींना अटक करण्यात आली असून, त्यांच्याविरुद्ध भाग्यनगर पोलीस ठाण्यात दाखल गुन्ह्यात पुढील तपास सुरू आहे.
ही उल्लेखनीय कारवाई पोलिस अधीक्षक निलाभ रोहन, अपर पोलिस अधीक्षक सरजू गुरव, पोलिस उपअधीक्षक रामेश्वर वैजने यांच्या मार्गदर्शनाखाली पोलीस निरीक्षक संतोष तांबे, पोलीस निरीक्षक (गुन्हे) तसेच गुन्हे शोध पथकातील अधिकारी व कर्मचाऱ्यांनी संयुक्तपणे केली. या कारवाईमुळे चोरीच्या गुन्ह्यांचा उलगडा करण्यात नांदेड पोलिसांना मोठे यश मिळाले असून, चोरीस गेलेला ऐवज मूळ मालकांना परत मिळण्याचा मार्ग मोकळा झाला आहे.
