नागपूर| राज्य सेवाहक्क आयोगाच्या अमरावती विभागाच्या आयुक्तपदी वरिष्ठ सनदी अधिकारी तथा म्हाडाचे सेवानिवृत्त मुख्य अधिकारी अरुण डोंगरे यांची नियुक्ती करण्यात आली आहे. मुंबई येथे मंगळवार दि. 12 मे रोजी आयोगाचे मुख्य आयुक्त मनुकुमार श्रीवास्तव यांच्या हस्ते त्यांना पद व गोपनीयतेची शपथ देण्यात येणार आहे.
अरुण डोंगरे यांनी आपल्या प्रशासकीय सेवेत विविध महत्त्वाच्या पदांवर उल्लेखनीय कार्य केले आहे. उपजिल्हाधिकारी तथा उपविभागीय अधिकारी म्हणून मंगरूळपीर येथून त्यांनी शासकीय सेवेला सुरुवात केली. त्यानंतर मूर्तिजापूर, दारव्हा, अचलपूर येथे उपविभागीय अधिकारी, अतिरिक्त जिल्हाधिकारी अमरावती तसेच महसूल उपायुक्त अमरावती व नागपूर या पदांवर त्यांनी काम पाहिले.
अमरावती महापालिका आयुक्त असताना शहर विकासासोबत ऑनलाइन इमारत परवाना प्रणाली प्रभावीपणे लागू केली. सोलापूर जिल्हा परिषदेचे मुख्य कार्यकारी अधिकारी म्हणून स्वच्छ भारत अभियानातील उत्कृष्ट कामगिरीबद्दल मुख्यमंत्री देवेंद्र फडणवीस आणि अभिनेते अमिताभ बच्चन यांच्या हस्ते त्यांचा गौरव झाला होता.
नांदेडचे जिल्हाधिकारी असताना त्यांनी ‘जलयुक्त शिवार’ योजना प्रभावीपणे राबवून राज्यस्तरावर विशेष प्रशंसा मिळवली. तसेच शिर्डी साईबाबा संस्थानचे मुख्य कार्यकारी अधिकारी आणि म्हाडामधील मुख्य अधिकारी म्हणूनही त्यांनी महत्त्वपूर्ण निर्णय घेत नागरिकांच्या पुनर्वसन व हक्कांसाठी काम केले. त्यांच्या प्रभावी व लोकाभिमुख कार्याची दखल घेत शासनाने त्यांची अमरावती विभागाच्या राज्य सेवाहक्क आयुक्तपदी नियुक्ती केली आहे.
