🔱 अमरनाथ गुहेतून – भाग २ 🔱 (लेखक – धर्मभूषण ॲड. दिलीप ठाकूर)

“घरातून निघालो… आणि भोलेनाथाने हजेरी घेतली!” आज तो दिवस अखेर उजाडला… ज्याची अनेक महिन्यांपासून प्रतीक्षा सुरू होती. पहाटे पाच वाजता डोळे उघडले तेव्हा बाहेर अजूनही अंधाराची चादर पसरलेली होती, पण मनात यात्रेचा सूर्य उगवला होता. सामानाची शेवटची एकदा पाहणी केली. कपडे, औषधे, मोबाईल चार्जर, रेनकोट, ओळखपत्र… सगळे व्यवस्थित होते. पण सर्वात महत्त्वाच्या दोन गोष्टी – रेल्वे तिकीट आणि यात्रा परची – त्या माझ्या खिशात सुरक्षित होत्या. अनुभवाने एक गोष्ट शिकवली आहे. हिमालयातील चढाईपेक्षा कधी कधी एखादा कागद जास्त महत्त्वाचा ठरतो. अनेक वर्षांपूर्वी एका कुटुंबाने यात्रा परची घरी विसरली होती. त्या दिवशी बाबा बर्फानींपेक्षा आम्हाला फोटोकॉपी सेंटर, कुरिअरवाला आणि मोबाईल नेटवर्क जास्त आठवत होते! त्या प्रसंगानंतर मी एक नियम बनवला – यात्रेकरू मोजण्याआधी यात्रा परच्या मोजायच्या. भक्तीच्या प्रवासात श्रद्धा जि...