आषाढी एकादशीनिमित्त सवना जिल्हा परिषद शाळेत भक्ती, संस्कार आणि शिक्षणाचा अनोखा संगम
हिमायतनगर, प्रतिनिधी| आषाढी एकादशीच्या पावन पर्वानिमित्त जिल्हा परिषद केंद्रीय प्राथमिक शाळा, सवना ज. येथे 'आनंददायी शनिवार' उपक्रमांतर्गत भक्ती, संस्कार आणि अनुभवाधारित शिक्षणाचा अनोखा संगम अनुभवायला मिळाला. विद्यार्थ्यांच्या उत्स्फूर्त सहभागामुळे संपूर्ण शाळा परिसर विठ्ठलनामाच्या गजराने भक्तिमय झाला.
कार्यक्रमाची सुरुवात भगवान श्री विठ्ठल-रुक्मिणी यांच्या प्रतिमेचे पूजन करून करण्यात आली. त्यानंतर विद्यार्थ्यांनी टाळ-मृदंगाच्या गजरात ज्ञानदिंडी काढत संत ज्ञानेश्वर, संत तुकाराम, संत नामदेव आणि संत एकनाथ यांच्या विचारांचा जागर केला. अभंग गायन, भजन, संतवाणी, नामस्मरण आणि संतांच्या जीवनकार्याचे सादरीकरण करत विद्यार्थ्यांनी समाजप्रबोधनाचा संदेश दिला. "विठ्ठल विठ्ठल" आणि "ज्ञानोबा-तुकोबा"च्या जयघोषाने वातावरण भक्तिरसाने भारावून गेले. या उपक्रमाच्या माध्यमातून विद्यार्थ्यांना भारतीय संस्कृती,...