हिमायतनगर (अनिल मादसवार) शहरातून जाणाऱ्या राष्ट्रीय महामार्गालगत दोन्ही बाजूने सुरू असलेल्या नाली बांधकामाच्या निकृष्ट दर्जाबाबत राष्ट्रवादी काँग्रेसने केलेल्या तक्रारीची अखेर राष्ट्रीय महामार्ग विभागाने गंभीर दखल घेतली आहे.
राष्ट्रवादी काँग्रेसचे तालुकाध्यक्ष वामनराव पाटील वडगावकर यांनी या कामात अंदाजपत्रकाला बगल देत दर्जाहीन काम होत असल्याची तक्रार केली होती. त्यानुसार आज (दि. ९ एप्रिल) सायंकाळी राष्ट्रीय महामार्ग विभागाचे शाखा अभियंता श्री देशपांडे यांनी हिमायतनगर येथे प्रत्यक्ष भेट देऊन कामाची पाहणी केली.
यावेळी त्यांनी तक्रारदार वामनराव पाटील यांच्याशी सविस्तर चर्चा करून नालीचे बांधकाम अंदाजपत्रकानुसार आणि दर्जेदार पद्धतीने पावसाळ्यापूर्वी पूर्ण करण्यात येईल, असे आश्वासन दिले.
दरम्यान, वामनराव पाटील यांनी यापूर्वी झालेल्या निकृष्ट कामावर तीव्र नाराजी व्यक्त करत ते पूर्णपणे फोडून नव्याने नाली बांधण्याची मागणी केली. तसेच, दर्जेदार साहित्य वापरले नाही तर राष्ट्रवादी काँग्रेस (अजितदादा गट) आमदार प्रतापराव पाटील चिखलीकर व जिल्हाध्यक्ष बाळासाहेब रावणगावकर यांच्या मार्गदर्शनाखाली आंदोलन व उपोषण छेडण्याचा इशाराही दिला.
या पाहणीमुळे हिमायतनगरमधील नाली बांधकामाचा मुद्दा चांगलाच ऐरणीवर आला असून, पुढील काम खरोखरच दर्जेदार होणार का..? आणि आधीचे निकृष्ट काम पुन्हा करण्यात येणार का…? याकडे नागरिकांचे लक्ष लागले आहे. यावेळी नगराध्यक्ष शेख रफिक शेठ, कानिष्ठ अभियंता सोनटक्के, ठेकेदाराचे प्रतिनिधी तसेच स्थानिक नागरिक उपस्थित होते.