भोकर (प्रतिनिधी) गर्भाशयमुख कर्करोगाच्या प्रतिबंधासाठी महत्त्वपूर्ण असलेल्या एचपीव्ही लसीकरण मोहिमेला भोकर येथील ग्रामीण रुग्णालयात शुभारंभ करण्यात आला आहे. जागतिक महिला दिनाच्या पार्श्वभूमीवर सुरू झालेल्या या मोहिमेत १४ ते १५ वयोगटातील मुलींना लस देण्यावर भर दिला जात आहे.
जिल्हाधिकारी राहुल कर्डीले, जिल्हा परिषद मुख्य कार्यकारी अधिकारी मेघना कावली, उपसंचालक आरोग्य सेवा डॉ. रेखा गायकवाड, जिल्हा शल्य चिकित्सक डॉ. संजय पेरके, जिल्हा आरोग्य अधिकारी डॉ. संगीता देशमुख तसेच निवासी वैद्यकीय अधिकारी डॉ. राजाभाऊ बुट्टे यांच्या मार्गदर्शनाखाली ही मोहीम राबविण्यात येत आहे.
ग्रामीण रुग्णालयाचे वैद्यकीय अधीक्षक डॉ. प्रताप चव्हाण यांच्या नियोजनानुसार ६ एप्रिल रोजी दोन मुलींना एचपीव्ही लस देऊन मोहिमेची सुरुवात करण्यात आली.
या उपक्रमांतर्गत पालकांना एचपीव्ही लसीबाबत सविस्तर माहिती देण्यात येत असून सोशल मीडियावर पसरलेल्या गैरसमजांबाबत जागृती केली जात आहे. त्यामुळे अनेक पालकांनी आपल्या मुलींना लसीकरणासाठी पुढाकार घेतला आहे.
दरम्यान, भोकर शहरातील पालकांनी १४ ते १५ वयोगटातील मुलींचे एचपीव्ही लसीकरण करण्यासाठी ग्रामीण रुग्णालयात आणावे आणि येताना आधार कार्ड सोबत आणावे, असे आवाहन करण्यात आले आहे.
या मोहिमेसाठी डॉ. ज्योती यन्नावार, डॉ. अपर्णा जोशी, डॉ. अविनाश गुंडाळे, इन्चार्ज सिस्टर उज्वला पवार, आरोग्य सेविका मुक्ता गुट्टे, सरस्वती दिवटे, संगीता पंदीलवाड तसेच आरोग्य कर्मचारी नामदेव कंधारे, योगेश पवार, संजय धुमाळे, मारोती गेंदेवाड आदींनी सक्रिय सहभाग नोंदविला.
गर्भाशयमुख कर्करोग प्रतिबंधासाठी ही मोहीम महत्त्वाची ठरणार असून भविष्यात महिलांच्या आरोग्याच्या दृष्टीने मोठा फायदा होणार असल्याचा विश्वास आरोग्य विभागाने व्यक्त केला आहे.