संघर्षातून यश; शेतकरी कन्या ऐश्वर्या कल्याणकर बनली डॉक्टर, गावाचा अभिमान वाढवला

नांदेड, संघरत्न पवार| जिल्ह्यातील तरोडा खुर्द या छोट्याशा गावातून अभिमानास्पद आणि प्रेरणादायी यशाची कहाणी समोर आली आहे. अत्यंत प्रतिकूल परिस्थितीवर मात करत शेतकरी कुटुंबातील लेक ऐश्वर्या किशनराव कल्याणकर हिने एमबीबीएस ही वैद्यकीय पदवी यशस्वीरीत्या पूर्ण करत डॉक्टर होण्याचं स्वप्न साकार केलं आहे.

लहानपणापासूनच अभ्यासात हुशार असलेल्या ऐश्वर्याने डॉक्टर होण्याचा निर्धार केला होता. आर्थिक अडचणी, ग्रामीण भागातील मर्यादा आणि संघर्षमय परिस्थिती यांचा सामना करत तिने जिद्द, चिकाटी आणि अथक परिश्रमांच्या जोरावर हे यश मिळवलं. तिच्या या यशामागे शेतकरी वडील किशनराव कल्याणकर यांच्या कष्टांची आणि पाठिंब्याची मोठी भूमिका आहे.

ऐश्वर्याने केवळ स्वतःचं स्वप्न पूर्ण केलं नाही, तर कुटुंबाचं आणि संपूर्ण गावाचं नाव उज्ज्वल केलं आहे. तिच्या यशामुळे तरोडा खुर्द गावात आनंदाचं वातावरण असून गावकऱ्यांकडून तिच्यावर शुभेच्छांचा वर्षाव होत आहे.

तिच्या या यशाबद्दल भुजंग शंकरराव, मदांकीनी कल्याणकर, भुजंगराव त्यागकर, आयुष कल्याणकर, जीविका व आर्यन तसेच आजी गिरजाबाई शंकरराव कल्याणकर यांनी अभिनंदन करून पुढील वाटचालीस शुभेच्छा दिल्या.

ग्रामीण भागातून आलेल्या ऐश्वर्याच्या या यशाने अनेक मुलींना नवी दिशा आणि प्रेरणा मिळाली असून, “जिद्द असेल तर यश नक्की मिळते” हे तिने पुन्हा एकदा सिद्ध करून दाखवले आहे.