नांदेड | आगामी सण-उत्सवांच्या पार्श्वभूमीवर कायदा व सुव्यवस्था अबाधित राखण्यासाठी नांदेड परिक्षेत्रात गुटखा, अंमली पदार्थ व घातक शस्त्रांविरोधात विशेष मोहीम सुरू करण्यात आली आहे. पोलीस उपमहानिरीक्षक शहाजी उमाप यांच्या मार्गदर्शनाखाली 11 ते 25 एप्रिलदरम्यान ही मोहीम राबविण्यात येणार आहे.
या मोहिमेच्या पहिल्याच दिवशी पोलिसांनी धडक कारवाई करत मोठा मुद्देमाल जप्त केला आहे. गुटखा विक्रीविरोधात भारतीय न्याय संहिता कलम 123 अंतर्गत 2 गुन्हे दाखल करून 1 लाख 17 हजार 642 रुपयांचा गुटखा जप्त करण्यात आला असून, दोन्ही आरोपींना अटक करण्यात आली आहे.
घातक शस्त्रांविरोधात राबविण्यात आलेल्या कारवाईत शस्त्र अधिनियमांतर्गत 11 गुन्हे दाखल करण्यात आले. आरोपींकडून 57 हजार 822 रुपयांच्या तलवारी व खंजर जप्त करण्यात आले असून, एकूण 12 आरोपींना अटक करण्यात आली आहे.
‘खबर’ हेल्पलाइनद्वारे माहिती द्या
अवैध व्यवसायांवर आळा घालण्यासाठी पोलिसांनी ‘खबर’ हेल्पलाइन सुरू केली असून, नागरिकांनी 9150100100 या क्रमांकावर फोन किंवा व्हॉट्सअॅपद्वारे माहिती देण्याचे आवाहन करण्यात आले आहे. पोलीस प्रशासनाने स्पष्ट केले आहे की, गुटखा, अंमली पदार्थ व घातक शस्त्रांविरोधातील ही मोहीम पुढील काही दिवस अधिक तीव्र करण्यात येणार असून, दोषींवर कठोर कारवाई केली जाणार आहे.
