नांदेड | नांदेड शहराच्या सर्वांगीण विकासाला गती देण्यासाठी नांदेड-वाघाळा महानगरपालिकेच्या विविध महत्त्वाकांक्षी प्रकल्पांचे लोकार्पण सोमवारी पार पडले. माजी मुख्यमंत्री तथा विद्यमान खासदार Ashok Chavan यांच्या हस्ते या विकासकामांचा शुभारंभ करण्यात आला.
महापालिकेत महायुतीची सत्ता आल्यानंतर जाहीर करण्यात आलेल्या १०० दिवसांच्या कृती आराखड्याची ही पहिली वचनपूर्ती मानली जात आहे.
या अंतर्गत कौठा परिसरात २४x७ पाणीपुरवठा योजनेचा प्रारंभ करण्यात आला. तसेच शहरातील स्वच्छता व्यवस्थेला बळकटी देण्यासाठी नवीन वाहनांचा ताफा दाखल करण्यात आला आहे. नागरिकांना अधिक सुलभ सेवा मिळाव्यात यासाठी तब्बल ७४ ऑनलाईन सेवांचाही शुभारंभ करण्यात आला.
यावेळी बोलताना खासदार चव्हाण म्हणाले, “नांदेडला स्मार्ट सिटीच्या दिशेने नेण्यासाठी पाणीपुरवठा, स्वच्छता आणि डिजिटल सेवा या त्रिसूत्रीवर भर दिला जात आहे.” या विकासकामांमुळे नागरिकांना आधुनिक सुविधा मिळण्यास मदत होणार असून शहराच्या प्रगतीला नवी चालना मिळणार असल्याचे मत मान्यवरांनी व्यक्त केले.
