नांदेड | नांदेड ग्रामीण पोलीसांनी गस्तीदरम्यान अवैध तलवार बाळगून फिरणाऱ्या एका युवकावर कारवाई करत त्याला ताब्यात घेतले. आरोपीकडून सुमारे 1 हजार रुपयांची लोखंडी तलवार जप्त करण्यात आली आहे.
पोलीस ठाणे नांदेड ग्रामीण येथे गुन्हा क्रमांक 387/2026 अंतर्गत शस्त्र अधिनियम कलम 4/25 प्रमाणे गुन्हा दाखल करण्यात आला आहे. शेख मुखीद शेख हबीब (वय 27, रा. वाजेगाव) असे अटक करण्यात आलेल्या आरोपीचे नाव आहे.
गुप्त माहितीवरून छापा
दि. 11 एप्रिल रोजी सायंकाळी वाजेगाव येथील गोदावरी नदीवरील छोट्या पुलाजवळ एक इसम तलवार घेऊन फिरत असल्याची गोपनीय माहिती पोलिसांना मिळाली. त्यानुसार पोलिसांनी तत्काळ घटनास्थळी धाव घेत छापा टाकला असता संबंधित आरोपी संशयास्पद अवस्थेत आढळून आला.
तलवार जप्त; गुन्हा दाखल
पंचासमक्ष आरोपीची झडती घेतली असता त्याच्याकडून एक लोखंडी तलवार जप्त करण्यात आली. त्यानंतर आरोपीविरुद्ध शस्त्र अधिनियमांतर्गत गुन्हा दाखल करून पुढील तपास सुरू करण्यात आला आहे. ही कारवाई पोलीस अधीक्षक अविनाश कुमार, अपर पोलीस अधीक्षक अर्चना पाटील व सुरज गुरव यांच्या मार्गदर्शनाखाली पोलीस निरीक्षक ओमकांत चिचोलकर व त्यांच्या पथकाने केली. या कामगिरीबद्दल संबंधित पथकाचे वरिष्ठांकडून कौतुक करण्यात आले आहे.
