नांदेड| दक्षिण मध्य रेल्वेच्या नांदेड विभागात रेल्वे सुरक्षा बल (RPF) तर्फे “ऑपरेशन डिग्निटी” अंतर्गत प्रवाशांच्या सुरक्षिततेसह सन्मान जपण्याचे उल्लेखनीय कार्य सातत्याने सुरू असून विविध घटनांमध्ये तात्काळ आणि संवेदनशील कारवाई करत गरजू प्रवाशांना मदतीचा हात दिला जात आहे.
दि. २७ मार्च रोजी दुपारी सुमारे २:३० वाजता पुर्णा रेल्वे स्थानकावर एक युवती घरातून पळून आल्याची माहिती महिला कॉन्स्टेबल गुड्डीबाई मीणा यांना मिळाली. तत्काळ कारवाई करत त्यांनी युवतीला सुरक्षितपणे आरपीएफ पोस्टवर आणून चौकशी केली. संबंधित युवती ही मुंबईतील जोगेश्वरी परिसरातील असल्याचे समोर आले. पुढील प्रक्रिया म्हणून तिला शासकीय रुग्णालयात वैद्यकीय तपासणीसाठी पाठवून नंतर परभणी येथील ‘सखी वन स्टॉप सेंटर’च्या स्वाधीन करण्यात आले.
याच दिवशी आणखी एका घटनेत, पंजाबमधील बठिंडा येथील मानसिक तणावाखालील महिला नांदेड स्थानकावरून बेपत्ता झाल्याची माहिती मिळाली होती. ती बेंगळुरू–नांदेड एक्सप्रेसने प्रवास करत असल्याचे निष्पन्न झाले. परभणी स्थानकावर हेड कॉन्स्टेबल अविनाश पाटील व महिला कॉन्स्टेबल मुक्ता भिसे यांनी सखोल शोध घेत संबंधित महिलेला सुरक्षित अवस्थेत शोधून काढले. त्यानंतर आवश्यक चौकशी करून तिच्या पतींशी संपर्क साधण्यात आला व सर्व प्रक्रिया पूर्ण केल्यानंतर महिलेला त्यांच्या स्वाधीन करण्यात आले.
दरम्यान, प्रवाशांची फसवणूक रोखण्यासाठी “ऑपरेशन उपलब्ध” अंतर्गतही आरपीएफने कठोर कारवाई केली. मुकुंदवाडी रेल्वे स्थानकावर गुप्त नजरेखाली ठेवलेल्या कारवाईत दोन दलालांना तत्काळ तिकिटांची बेकायदेशीर विक्री करताना रंगेहाथ पकडण्यात आले. त्यांच्या ताब्यातून ₹३,७६० किमतीची स्लीपर क्लासची तिकिटे जप्त करण्यात आली. चौकशीत त्यांनी प्रवाशांकडून अतिरिक्त ₹२०० घेऊन तिकिटांची विक्री केल्याची कबुली दिली. या प्रकरणी दोघांविरुद्ध रेल्वे अधिनियमाच्या कलम १४३ अंतर्गत गुन्हा दाखल करण्यात आला आहे.
या सर्व कारवायांमधून नांदेड विभागातील आरपीएफ प्रवाशांच्या सुरक्षेसोबतच त्यांचा सन्मान अबाधित ठेवण्यासाठी कटिबद्ध असल्याचे पुन्हा एकदा अधोरेखित झाले आहे. आरपीएफच्या तात्काळ आणि मानवतावादी भूमिकेमुळे प्रवाशांमध्ये समाधान व्यक्त होत आहे.
