नांदेड रेल्वे विभागाची विक्रमी कामगिरी; तिकीट तपासणीतून ₹14.95 कोटी महसूल
नांदेड | दक्षिण मध्य रेल्वेच्या नांदेड विभागाने आर्थिक वर्ष 2025–26 मध्ये तिकीट तपासणी महसूलात आतापर्यंतची सर्वोत्तम कामगिरी नोंदवत नवा विक्रम प्रस्थापित केला आहे. विशेष मोहिमांच्या माध्यमातून विभागाने तब्बल ₹14.95 कोटी महसूल प्राप्त केला असून, हा आकडा मुख्यालयाने दिलेल्या ₹14.80 कोटी उद्दिष्टापेक्षाही जास्त आहे.
विशेष म्हणजे, आर्थिक वर्ष संपण्यास तीन दिवस बाकी असताना, म्हणजेच 28 मार्च 2026 रोजीच उद्दिष्ट पूर्ण करण्यात आले. यावरून तिकीट तपासणी कर्मचाऱ्यांची मेहनत, तत्परता आणि कार्यक्षमता अधोरेखित होते. ही कामगिरी मागील वर्षातील (2024–25) ₹12.59 कोटींच्या विक्रमालाही मागे टाकणारी ठरली आहे.
एका दिवसातील सर्वाधिक महसूल: ₹10.90 लाख (17 ऑक्टोबर 2025) महिन्यातील सर्वोत्तम महसूल: ₹1.55 कोटी (ऑक्टोबर 2025) रेल्वे गाड्या व स्थानकांवर राबविण्यात आलेल्या विशेष तिकीट तपासणी मोहिमा, सुसूत्र नियोजन आणि सातत्यपूर्ण देखरेख यामुळे ही उल्लेखनीय कामगिरी साध्य झाली आहे.
विनातिकीट प्रवासावर (TWT) नियंत्रण ठेवून महसूल वाढविण्यात तिकीट तपासणी कर्मचाऱ्यांचा मोठा वाटा असल्याचे स्पष्ट झाले आहे. विभागीय रेल्वे व्यवस्थापक प्रदीप कामले यांनी या यशाबद्दल वाणिज्य विभाग व तिकीट तपासणी कर्मचाऱ्यांचे कौतुक करत त्यांचे अभिनंदन केले. नांदेड विभाग भविष्यातही प्रामाणिक प्रवासाची संस्कृती बळकट करण्यासाठी आणि रेल्वे महसूल संरक्षणासाठी कटिबद्ध राहणार असल्याचे प्रशासनाने स्पष्ट केले आहे.
