लोह्यात भव्य शेतकरी मेळावा; उपमुख्यमंत्री एकनाथ शिंदे यांची मोठी घोषणा

नांदेड/लोहा | नांदेड जिल्ह्यातील लोहा येथे आयोजित भव्य राज्यस्तरीय शेतकरी मेळाव्यात राज्याचे उपमुख्यमंत्रीएकनाथ शिंदे (Eknath Shinde) यांनी शेतकरी व महिला कल्याणाच्या विविध योजनांबाबत महत्त्वपूर्ण भूमिका मांडत मोठ्या घोषणा केल्या. या मेळाव्याला जिल्ह्यासह आसपासच्या भागातून शेतकरी, महिला व कार्यकर्त्यांनी मोठ्या संख्येने उपस्थिती लावली होती.

कार्यक्रमाचे प्रमुख आकर्षण म्हणजे माजी आमदार व ज्येष्ठ शेतकरी नेते शंकर अण्णा धोंडगे यांचा शिवसेना पक्षात जाहीर प्रवेश. या वेळी त्यांचा “महाराष्ट्राचे शेतकरी नेते” असा गौरव करण्यात आला. त्यांच्या प्रवेशामुळे स्थानिक राजकारणात नव्या समीकरणांची चर्चा रंगू लागली आहे.

उपमुख्यमंत्री शिंदे यांनी आपल्या भाषणात राज्य सरकारच्या विविध योजनांचा आढावा घेतला. विशेषतः “लाडकी बहिण” योजनेचा उल्लेख करत ही योजना कोणत्याही परिस्थितीत बंद होणार नसल्याचे त्यांनी ठामपणे सांगितले. पात्र महिलांना दिली जाणारी आर्थिक मदत वाढवून २१०० रुपयांपर्यंत नेण्याचा विचार सुरू असल्याचेही त्यांनी सूचित केले. यामुळे उपस्थित महिलांमध्ये उत्साहाचे वातावरण निर्माण झाले.

शेतकऱ्यांच्या प्रश्नांवर बोलताना शिंदे यांनी सरकार शेतकऱ्यांच्या पाठीशी ठामपणे उभे असल्याचे सांगितले. शेतीमालाला योग्य दर, सिंचन सुविधा, कर्जमाफीसह विविध बाबींवर सरकार सकारात्मक पावले उचलत असल्याचे त्यांनी नमूद केले.

या मेळाव्यात विविध मान्यवरांची उपस्थिती लाभली. स्थानिक पदाधिकारी, लोकप्रतिनिधी आणि कार्यकर्त्यांनी कार्यक्रमाच्या यशस्वीतेसाठी विशेष मेहनत घेतली.
दरम्यान, या मेळाव्यामुळे नांदेड जिल्ह्यातील राजकीय वातावरण चांगलेच तापले असून आगामी निवडणुकांच्या पार्श्वभूमीवर या घडामोडींना विशेष महत्त्व प्राप्त झाले आहे.