नांदेड| राजकारणात बदल हा शाश्वत असतो, याची प्रचिती पुन्हा एकदा नांदेड जिल्ह्यात पाहायला मिळत आहे. तब्बल पाच विधानसभा निवडणुकांत शिवसेनेविरुद्ध लढत देणारे ज्येष्ठ शेतकरी नेते शंकरअण्णा धोंडगे आता शिवसेनेत प्रवेश करण्याच्या तयारीत आहेत. २९ मार्च रोजी लोहा येथे उपमुख्यमंत्री एकनाथ शिंदे (Eknath Shinde) यांच्या उपस्थितीत ते शिवबंधन बांधणार आहेत.
नव्वदच्या दशकात “भीक नको, हवे घामाचे दाम” या घोषणेने राज्यभर आंदोलने उभारणारे शंकरअण्णा धोंडगे हे शरद जोशी (Sharad Joshi) यांच्या विचारातून घडलेले नेते. शेतकरी संघटनेच्या माध्यमातून त्यांनी राज्यभर संघर्ष करत अनेकदा जेलही भोगली. प्रभावी वक्तृत्व आणि शेतकऱ्यांशी असलेला थेट संवाद यामुळे त्यांनी मोठा कार्यकर्ता वर्ग तयार केला.
१९९५ पासून कंधार विधानसभा मतदारसंघात त्यांनी अपक्ष आणि नंतर विविध पक्षांतून निवडणुका लढवत शिवसेनेशी थेट मुकाबला केला. त्या काळात बाळ ठाकरे (Bal Thackeray) यांच्या प्रभावाखालील शिवसेनेशी त्यांनी जोरदार राजकीय लढत दिली. अनेक निवडणुकांत ते दुसऱ्या क्रमांकावर राहिले, तर २००९ मध्ये विजयही मिळवला.
पुढे त्यांनी शरद पवार (Sharad Pawar) यांच्या नेतृत्वाखाली राष्ट्रवादी काँग्रेसमध्ये प्रवेश केला आणि ‘राष्ट्रवादी किसान भारती’च्या माध्यमातून शेतकरी प्रश्नांवर काम केले. मात्र बदलत्या राजकीय समीकरणांमुळे आता त्यांनी शिवसेनेत प्रवेश करण्याचा निर्णय घेतला आहे.
दरम्यान, लोहा येथे होणाऱ्या राज्यस्तरीय शेतकरी अधिवेशनासाठी मोठी तयारी सुरू असून या कार्यक्रमाला आमदार, पदाधिकारी आणि कार्यकर्त्यांची मोठ्या प्रमाणात उपस्थिती राहणार आहे. शंकरअण्णा धोंडगे यांच्या या निर्णयामुळे नांदेड जिल्ह्यातील राजकीय समीकरणे बदलण्याची चिन्हे दिसत असून त्यांच्या ‘भगवा’ प्रवेशाकडे सर्वांचे लक्ष लागले आहे.
