परभणी (प्रतिनिधी) दक्षिण मध्य रेल्वेच्या नांदेड विभागांतर्गत परभणी रेल्वे स्थानकावर आज (५ एप्रिल) सकाळी तोडफोड व मारहाणीची धक्कादायक घटना घडली. प्लॅटफॉर्म क्रमांक २/३ वरील लिफ्टच्या दरवाज्याचा लॉक तोडून सीसीटीव्ही कॅमेऱ्याची नासधूस करण्यात आली, तसेच देखभाल कर्मचाऱ्यावर हल्लाही करण्यात आला.
मिळालेल्या माहितीनुसार, एका अज्ञात व्यक्तीने लिफ्टमध्ये घुसून दरवाज्याचा लॉक तोडत सीसीटीव्ही कॅमेरा फोडण्याचा प्रयत्न केला. ही बाब ड्युटीवर असलेल्या इलेक्ट्रिकल मेंटेनन्स कर्मचाऱ्यांच्या लक्षात येताच त्यांनी संबंधित व्यक्तीला थांबवण्याचा प्रयत्न केला. मात्र, त्या व्यक्तीने आक्रमक होत कर्मचाऱ्याशी शिवीगाळ करत त्याला मारहाण केली.
परिस्थिती हाताळताना संबंधित कर्मचाऱ्याने आरोपीचा फोटो काढण्यात यश मिळवले आणि तत्काळ इतर कर्मचारी तसेच रेल्वे संरक्षण दल यांना माहिती दिली. मात्र, मदत पोहोचण्यापूर्वीच आरोपी घटनास्थळावरून फरार झाला.
घटनास्थळी तपासणीदरम्यान लिफ्टचा लॉक व सीसीटीव्ही कॅमेरा नुकसान झालेल्या अवस्थेत आढळून आला. रेल्वे प्रशासनाने या घटनेची गांभीर्याने दखल घेतली असून उपलब्ध पुराव्यांच्या आधारे आरोपीचा शोध सुरू केला आहे. संबंधित व्यक्तीविरोधात रेल्वे मालमत्तेची तोडफोड व कर्मचाऱ्यावर हल्ला केल्याप्रकरणी कायदेशीर कारवाई करण्यात येणार आहे.
दरम्यान, स्थानक परिसरातील सुरक्षा व्यवस्था अधिक बळकट करण्याच्या सूचना देण्यात आल्या असून नुकसानग्रस्त लिफ्ट व सीसीटीव्ही तातडीने दुरुस्त करण्याचे काम हाती घेण्यात आले आहे. रेल्वे प्रशासनाने नागरिकांना आवाहन केले आहे की, स्थानकावरील प्रवासी सुविधांचा जबाबदारीने वापर करावा व कोणतीही संशयास्पद हालचाल आढळल्यास तात्काळ प्रशासन किंवा RPF ला कळवावे.
