नांदेड (प्रतिनिधी) शहरातील वाढत्या वाहतूक कोंडी आणि नियमभंगावर आळा घालण्यासाठी शहर वाहतूक शाखा वजिराबादने विशेष मोहीम राबवत मोठी कारवाई केली. या मोहिमेत अवैध प्रवासी वाहतूक, विना परवाना धावणारी वाहने, फटाका बुलेट, ट्रिपल सीट, मोबाईल वापरत वाहन चालविणारे तसेच रस्त्यावर अतिक्रमण करणाऱ्या फळगाड्यांवर कारवाई करत एकूण २४१ केसेस नोंदवण्यात आल्या.
ही कारवाई अबिनाश कुमार, पोलीस अधीक्षक, नांदेड यांच्या आदेशानुसार करण्यात आली. त्यांच्या मार्गदर्शनाखाली सुरज गुरव आणि शहर वाहतूक शाखेचे सहायक पोलीस निरीक्षक भागवत नागरगोजे यांनी पथकासह ही मोहीम राबवली.
रेल्वे स्टेशन रोड, महावीर चौक, कलामंदिर वर्कशॉप, राजकॉर्नर आणि छत्रपती चौक या प्रमुख भागात वाहनांची कागदपत्र तपासणी करण्यात आली. तसेच ऑटो- चालकांना गणवेश परिधान करण्याच्या सूचनाही देण्यात आल्या. या कारवाई दरम्यान नियमांचे उल्लंघन करणाऱ्यांकडून तब्बल २,५४,५५० रुपयांचा दंड वसूल करण्यात आला. रस्त्यावर अतिक्रमण करणारे हातगाडे व वाहने हटवून वाहतुकीस अडथळा निर्माण करणाऱ्यांवरही कारवाई करण्यात आली.
नागरिकांना प्रशासनाचे आवाहन
वाहतूक कोंडी टाळण्यासाठी वाहनधारकांनी पार्किंगच्या ठिकाणीच वाहने उभी करावीत, सिग्नलचे पालन करावे आणि रस्त्यावर अतिक्रमण टाळावे, असे आवाहन पोलिस प्रशासनाने केले आहे. नियमांचे उल्लंघन केल्यास मोटार वाहन कायद्यानुसार कठोर कारवाई करण्यात येईल, असा इशाराही देण्यात आला आहे. शहरातील शिस्तबद्ध वाहतूक व्यवस्थेसाठी ही कारवाई महत्त्वाची ठरत असून नागरिकांनीही सहकार्य करण्याची गरज अधोरेखित झाली आहे.
