तुळजापूर | आई तुळजाभवानी देवीच्या महिम्याचे दर्शन घडवणारे ‘जय जगदंब’ हे आकर्षक कॉफीटेबल पुस्तक तुळजापूर येथे दिमाखात प्रकाशित करण्यात आले. या प्रकाशन सोहळ्यात माजी मुख्यमंत्री तथा खासदार अशोक चव्हाण (Ashok Chavan) यांनी पुस्तकाचे कौतुक करत ते भाविकांसह इतिहास संशोधकांसाठी अत्यंत उपयुक्त ठरेल, असे मत व्यक्त केले.
लेखक श्रीकांत दीक्षित (Shrikrishna Dixit) यांनी या पुस्तकातून आदिमाता जगदंबेचा गौरवशाली इतिहास, परंपरा आणि वैभव सोप्या व प्रभावी भाषेत मांडले आहे. त्यामुळे हे पुस्तक प्रत्येक देवीभक्ताने संग्रही ठेवण्यासारखे असल्याचे चव्हाण यांनी नमूद केले.
या सोहळ्याचे अध्यक्षस्थान राणा जगजीतसिंह पाटील यांनी भूषवले. यावेळी सतीश चव्हाण , अमिताताई चव्हाण , जितेश अंतापूरकर , श्रीजया चव्हाण , डी . पि . सावंत यांच्यासह अनेक मान्यवर उपस्थित होते. पुस्तकात तुळजाभवानी देवीची सविस्तर आराधना, दुर्मिळ छायाचित्रे आणि ऐतिहासिक संदर्भांचा समावेश असून, विशेषतः सरदार वल्लभभाई पटेल आणि निजाम यांचा दुर्मिळ फोटो संशोधकांसाठी महत्त्वाचा ठरणार आहे.
कार्यक्रमाचे आयोजक अमरनाथ राजूरकर यांनी सांगितले की, हे पुस्तक व्यावसायिक हेतूने नव्हे तर धार्मिक व ऐतिहासिक माहितीचा ठेवा म्हणून प्रकाशित करण्यात आले आहे. एकूणच ‘जय जगदंब’ हे पुस्तक तुळजाभवानी भक्तांसाठी तसेच इतिहास अभ्यासकांसाठी मार्गदर्शक ठरणार असून, या भव्य प्रकाशन सोहळ्याला विविध क्षेत्रातील मान्यवरांची मोठी उपस्थिती लाभली.
