धर्माबाद| शहरात चोरीस गेलेली मोटारसायकल अवघ्या काही दिवसांत शोधून काढत धर्माबाद पोलिसांनी आरोपीस जेरबंद केले आहे. आरोपीकडून 30 हजार रुपये किमतीची मोटारसायकल जप्त करण्यात आली आहे.
या प्रकरणी धिरज गोवर्धन कासट (रा. बालाजी गल्ली, धर्माबाद) यांनी आपल्या घरासमोर उभी केलेली मोटारसायकल चोरीस गेल्याची तक्रार दिली होती. ही घटना 4 एप्रिल रात्री 11.30 ते 5 एप्रिल पहाटे 1 वाजण्याच्या दरम्यान घडली होती. त्यानुसार धर्माबाद पोलीस ठाण्यात गु.र.नं. 71/2025 अन्वये भारतीय न्याय संहिता कलम 303(2) प्रमाणे गुन्हा दाखल करण्यात आला होता.
गुन्ह्याचा तपास सुरू असताना पोलिसांनी गस्तीदरम्यान एका संशयित इसमास ताब्यात घेतले. चौकशीदरम्यान त्याने मोटारसायकल चोरी केल्याची कबुली दिली. आरोपीचे नाव लक्ष्मण सावलू बरसा (वय 25, रा. बासर, जि. निजामाबाद) असे असून त्याच्याकडून चोरीस गेलेली मोटारसायकल (MH 26 AE 9250) जप्त करण्यात आली.
ही कारवाई अविनाश कुमार, अर्चना पाटील, सूरज गुरव तसेच उपविभागीय पोलीस अधिकारी दशरथ पाटील यांच्या मार्गदर्शनाखाली पोलीस निरीक्षक सदाशिव भडीकर यांच्या पथकाने केली. दरम्यान, आरोपीस न्यायालयात हजर केले असता त्याला न्यायालयीन कोठडी सुनावण्यात आली असून पुढील तपास सुरू आहे. या कारवाईबद्दल पोलीस अधीक्षकांनी संबंधित पथकाचे कौतुक केले आहे.
