नांदेड| शहरात अवैध हत्यारे बाळगून फिरणाऱ्या दोन इसमांना विमानतळ पोलिसांनी स्ट्रिट सेफ्टी पथकाच्या मदतीने ताब्यात घेत मोठी कारवाई केली आहे. आरोपींकडून पिस्टल, खंजर, दुचाकी व मोबाईल असा एकूण 1 लाख 35 हजार रुपयांचा मुद्देमाल जप्त करण्यात आला आहे.
ही कारवाई 8 एप्रिल रोजी कोम्बिंग ऑपरेशन व गस्तीदरम्यान करण्यात आली. पोलिसांना मिळालेल्या गोपनीय माहितीनुसार, दोन इसम अवैध हत्यारे बाळगून फिरत असल्याची माहिती मिळाल्यानंतर पथकाने मातागुजरी चौक परिसरात सापळा रचला. संशयितांना अडवून झडती घेतली असता त्यांच्याकडून एक लोखंडी पिस्टल, दोन खंजर, एक मोबाईल फोन व एक पल्सर मोटारसायकल आढळून आली.
ताब्यात घेण्यात आलेल्या आरोपींची नावे खुशालसिंग नानकसिंग गिल (वय 22, संभाजीनगर/नांदेड) व जयमितसिंग बलविरसिंग साहू (वय 22, हिंगोली/नांदेड) अशी आहेत. या प्रकरणी विमानतळ पोलीस ठाण्यात गु.र.नं. 129/2026 अन्वये भारतीय हत्यार कायदा कलम 3/25, 4/25 अंतर्गत 9 एप्रिल 2026 रोजी गुन्हा दाखल करण्यात आला आहे.
ही कारवाई अविनाश कुमार, अर्चना पाटील व सुरज गुरव यांच्या मार्गदर्शनाखाली स्ट्रिट सेफ्टी पथक प्रमुख पोलीस निरीक्षक भागवत नागरगोजे यांच्या नेतृत्वात पार पडली. दरम्यान, या धडक कारवाईबद्दल पोलीस अधीक्षकांनी संबंधित पथकाचे कौतुक करत अभिनंदन केले आहे.
